Memleket basshysy saparlarynyń nátıjesinde qandaı jobalar iske asyrylady
ASTANA. KAZINFORM — Memleket basshysy Qasym-Jomart Toqaevtyń byltyrǵy sheteldik saparlary barysynda 141 kommertsııalyq qujat rásimdeldi. Búginde atalǵan kelisimder aıasynda elimizde birqatar iri joba júzege asyryla bastady. Bul týraly Syrtqy ister mınıstrliginen málim etti.
— 2025 jyly Memleket basshysy saparlaryń qorytyndysynda jalpy somasy 74,3 mlrd AQSh dollary bolatyn 141 kommertsııalyq qujatqa qol qoıyldy. Bul kelisimder elimizdiń uzaq merzimdi damý basymdyqtaryna tolyq sáıkes keletin energetıka, tsıfrlyq tehnologııalar, kólik-logıstıka, agroónerkásiptik keshen, densaýlyq saqtaý, bilim berý jáne qurylys salalaryn qamtıdy. Atalǵan kelisimder aıasynda birqatar iri ári júıe quraýshy jobany iske asyrý kózdelgen, — dedi Syrtqy ister mınıstrliginen agenttiktiń resmı saýalyna oraı.
Máselen, syrtqy saıasat vedomstvosynyń málimetinshe, otyn-energetıka salasynda «CNPC» jáne «Air Liquide» kompanııalarynyń qatysýymen birqatar óndiristik jáne tehnologııalyq jobalar júzege asyrylyp jatyr. Kólik jáne logıstıka baǵytynda «Abu Dhabi Ports Group» kompanııasymen birlesip, tranzıttik ınfraqurylymdy damytýǵa jáne halyqaralyq dálizderdiń tıimdiligin arttyrýǵa baǵyttalǵan bastamalar qolǵa alynǵan. Agroónerkásiptik keshende «Tiryaki Agro» kompanııasymen birlesip, aýyl sharýashylyǵy ónimderin tereń óńdeýge baǵyttalǵan óndirister men iri agroónerkásiptik keshenderdi qurý jumystary júrgizilip jatyr.
— Jalpy alǵanda, Qazaqstan ekonomıkalyq ósimniń ornyqty qarqynyn saqtap otyr. Halyqaralyq qarjy uıymdarynyń baǵalaýynsha, elimizdiń ataýly jalpy ishki ónimi 300 mlrd AQSh dollarynan asyp, Qazaqstan álemniń iri 50 ekonomıkasynyń qataryna endi. Sońǵy jyldary ekonomıkanyń naqty ósimi turaqty túrde joǵary deńgeıde qalyptasýda. Bul — júrgizilip jatqan júıeli reformalar men ınvestıtsııalyq saıasattyń tıimdiligin kórsetedi. Investıtsııalyq áleýetti odan ári arttyrý maqsatynda Úkimet pen syrtqy saıasat vedomstvosy tarapynan keshendi sharalar qabyldanýda. Eń aldymen, óńirlerdiń naqty qajettilikterin eskere otyryp, ınvestıtsııalyq jobalardyń sapaly pýly qalyptastyrylyp jatyr, — dedi vedomstvodan.
Syrtqy ister mınıstrligi sheteldegi mekemeler arqyly «targetteý» qaǵıdattaryna negizdelgen jumys aıasynda áleýetti ınvestorlardy izdestirýdi jáne bastapqy kelissózderdi uıymdastyrýdy qamtamasyz etedi. Bul ınvestorlardyń naqty suranystaryna jaýap beretin, daıyn ári básekege qabiletti jobalardy usynýǵa múmkindik beredi.
— Memleket basshysynyń tapsyrmasy boıynsha Eýrazııalyq damý bankiniń qoldaýymen Ulttyq tsıfrlyq ınvestıtsııalyq platforma iske qosyldy. Atalǵan júıe ınvestorlar men memlekettik organdar arasyndaǵy ózara is-qımyldy jedeldetip, barlyq ınvestıtsııalyq jobalar boıynsha protsesterdiń ashyqtyǵy men merzimderiniń saqtalýyn naqty ýaqyt rejıminde baqylaýǵa múmkindik beredi. Platformaǵa Úkimet Apparaty, ortalyq jáne jergilikti atqarýshy organdar, sondaı-aq kvazımemlekettik sektor uıymdary qosylǵan. Jalpy qabyldanyp jatqan sharalar ınvestıtsııalyq qyzmetti júıeli, ashyq ári nátıjege baǵdarlanǵan deńgeıge shyǵarýǵa, halyqaralyq bıznespen tikeleı baılanysty kúsheıtýge jáne el ekonomıkasyna iri ári sapaly ınvestıtsııalar tartýǵa baǵyttalǵan, — dedi Syrtqy ister mınıstrligi.
Aıta keteıik, elimizde memlekettik ınvestıtsııalyq jobalardy iske asyrý qaǵıdalaryna ózgerister engiziledi.
