Memleket basshysy «SANA» oqýshylar saraıyn aralap kórdi
Bes qabatty zamanaýı ǵımaratta 5-17 jas aralyǵyndaǵy jetkinshikterge arnalǵan 60-tan astam úıirme men sport sektsııalary jumys isteıdi, dep habarlaıdy Aqordanyń baspasóz qyzmeti.
Olar tehnıkalyq shyǵarmashylyq, sándik-qoldanbaly óner, áleýmettik ǵylymdar, mýzyka jáne horeografııa, sport sekildi birneshe baǵytqa bólingen. Ortalyq bir mezgilde 700 balany qabyldaı alady. Aýmaǵy 7500 sharshy metr ǵımaratta sońǵy úlgidegi tehnologııalarmen jabdyqtalǵan oqý kabınetteri, júzý basseıni, akt zaly, podkast jáne foto stýdııalary bar.
Memleket basshysy Lego qurastyrý, robotty tehnıka, 3D-modeldeý jáne qysh óneri, urmaly aspaptar, dombyra úıirmesi kabınetteri men júzý basseınin aralap kórdi. Sondaı-aq Prezıdent ortalyqtyń oqytýshylarymen, balalarmen jáne ata-analarmen áńgimelesti.
– Árbir qalada, aýdanda osyndaı ortalyqtar ashylýy kerek. Men jaqynda bıznes ókilderimen kezdesý ótkizdim. Bul balalar úshin, óskeleń urpaq úshin qajet. Sondyqtan biz bul máselege basa mán beremiz, – dedi Qasym-Jomart Toqaev.
«SANA» jańa urpaq ortalyǵyn «Damu Development Group» konsortsıýmy bıznestiń áleýmettik jaýapkershiligi aıasynda salǵan. Kompanııa quryltaıshysy Abzal Saǵymbaev aldaǵy ýaqytta birneshe damytý ortalyqtaryn, áleýmettik, densaýlyq saqtaý nysandaryn salý josparlanyp otyrǵanyn jetkizdi.
Astana qalasynyń ákimi Jeńis Qasymbektiń aıtýynsha, 2029 jylǵa deıin elordada osyndaı 15 oqýshylar saraıy boı kóteredi. Onyń ishinde 5 ortalyqtyń qurylysy jýyq arada bastalady.
