Memleket basshysy: Salyq reformasy – qatardaǵy «fıskaldyq naýqan» emes, salyq júıesin qaıta qurý

ASTANA. KAZINFORM –  Jańa Salyq kodeksinde baqylaý jasaýǵa emes, ózara seriktestik ornatýǵa basa mán beriledi. Mundaı pikirdi «Turkistan» gazetine suhbat bergen Memleket basshysy Qasym-Jomart  Toqaev bildirdi.

- Árıne, salyq reformasy – ózekti másele jáne buǵan qatysty pikirtalastardyń bolýy ábden túsinikti. Degenmen el ishinde dúrbeleń týǵyzyp, jurtty dúrliktirýdiń eshqandaı jóni joq. Mundaı reforma kóptegen elde júrgizilip jatyr. Mysaly, Reseıde qosymsha qun salyǵy jýyrda 22 paıyzǵa deıin kóterildi. Bizdiń reformamyz – qatardaǵy «fıskaldyq naýqan» emes, salyq júıesin qaıta qurý degen sóz. Aldymyzda turǵan basty mindet – ekonomıkanyń turaqty ósimin qamtamasyz etý. Úkimetke ashyq ári uǵynyqty Salyq kodeksin ázirleý tapsyryldy. Mınıstrler kabınetiniń bul tapsyrmany qanshalyqty tabysty oryndap shyqqanyn bıyl kóretin bolamyz, - dedi Prezıdent.

Memleket basshysynyń aıtýynsha, burynǵy Úkimet qosymsha qun salyǵyn, tipti, 20 paıyzǵa deıin kóterýdi usyndy. Olar fıskaldyq saıasatta qatelik jiberilgenin eskere otyryp, mundaı qadamnyń óte qajet ekenin moıyndady. Talqylaý barysynda qazirgi Úkimet te qosymsha qun salyǵyn 20 paıyzǵa deıin kóterýdi usyndy.

- Alaıda, men Úkimetke onyń joǵarǵy shegin 4 satyǵa tómendetý týraly tapsyrma berdim. Jańa Salyq kodeksinde baqylaý jasaýǵa emes, ózara seriktestik ornatýǵa basa mán beriledi, ıaǵnı, osy úderiske qatysýshylardyń bári – memleket te, bıznes te, azamattar da óz mindetin adal oryndaýǵa tıis. Birin-biri ózara tolyqtyryp turatyn mundaı júıede salyq tóleý aýyrtpalyq retinde qabyldanbaıtyn bolady. Túptep kelgende, salyq tóleý degenimiz – zamanaýı qoǵamdyq kelisimshart degen sóz. Salyq tóleseńiz – qyzmet kórsetiledi, ınfraqurylym salynady, qaýipsiz orta qalyptasady, tyń múmkindikter paıda bolady. Kerek deseńiz, bul – ádildik bolý úshin júktemeni qaıta bólý quraly, áleýmettik turǵydan álsizderdi qoldaý jáne ekonomıkalyq turǵydan «belsendi ortany» odan ári damytý tásili, - dedi Qasym-Jomart Toqaev.

Memleket basshysy búkil álemde fıskaldyq saıasattyń tıimdiligi ony júrgizýdiń sapasymen, jurttyń salyq jónindegi saýatymen jáne qoǵamnyń sana-sezimimen ólshenetinin aıtty.

- Salyq tóleý mádenıeti dál osylaı qalyptasady. Salyq tóleý buryn mindet bolsa, endi otanshyldyqtyń ozyq úlgisine aınalady. Muny sybaılas jemqorlyqqa qarsy qoǵam qurýdyń tóte joly deýge bolady. Sebebi salyǵyn adal tóleıtin azamattar óz qarjysynyń alaıaqtardyń qaltasynda ketkenin múldem unatpasy anyq, - dedi Prezıdent.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.