Memleket basshysy salyq-bıýdjet úderisterin jetildirýge qatysty birqatar usynys aıtty

ASTANA. KAZINFORM – Prezıdent aımaqtar arasyndaǵy teńgerimdi nyǵaıtý jáne salyqtyq túsimderdiń ádil bólinýin qamtamasyz etý úshin salyq-bıýdjet úderisterin jetildirý qajet ekenin atap ótti.

«Zańdy tulǵalardyń múlik jáne jeke tabys salyǵynyń belgili bir bóligi aýdandardyń qosymsha transfertteri arqyly tórtinshi deńgeıli bıýdjetke aýdarylǵany jón. Munyń bárin Úkimet óńirler arasyndaǵy alshaqtyqty retteýdi kózdeıtin Aımaqtyq standarttar júıesimen ushtastyrýy qajet», – dedi Qasym-Jomart Toqaev.

Onyń aıtýynsha, ekologııalyq tólemder máselesi de ózekti bolyp otyr.

«Birqatar óńir turǵyndary úshin ekologııalyq aıyppuldardy tolyq tóleý asa ózekti másele. Óndiris oryndary ekologııaǵa shekten tys zııan keltiretin eldi mekender turǵyndary mundaı tólemderdiń bir bóligi jergilikti bıýdjetke túskenin qalaıdy. Olar buǵan tolyq quqyly», - dedi Memleket basshysy.

Prezıdenttiń paıymynsha, bul salaǵa júıeli ózgerister qajet.

«Baıqalǵan teńsizdikti rettep, memlekettik saıasattyń ashyqtyǵyn, tıimdiligi men ádildigin qamtamasyz etý úshin biz salyq-bıýdjet úderisterin júıeli túrde jetildire beremiz. Bul – Úkimet jumysynyń mańyzdy baǵyty.

Úkimet óńirdegi bıýdjet deńgeıleri arasynda qazynadan qarjy alýǵa lımıt qoıý máselesin qarastyrýy kerek», – dedi Prezıdent.

Aıta keteıik, Prezıdent tórtinshi deńgeıli bıýdjettiń derbestigin arttyrýdy tapsyrdy.