Memleket basshysy Rýanda prezıdentimen keńeıtilgen quramda kelissóz júrgizdi
ASTANA. KAZINFORM – Memleket basshysy Rýanda Prezıdenti Pol Kagameniń Qazaqstanǵa 2015 jyly jasaǵan saparynan keıin eki eldiń ózara qurmetke negizdelgen, yntymaqtastyq pen ornyqty damýdy kózdeıtin qarym-qatynasy aıtarlyqtaı tabysqa jetkenin atap ótti. Bul týraly Aqordanyń baspasóz qyzmeti habarlady.
Prezıdent Qazaqstannyń Afrıka memleketterimen baılanysty keńeıtýge erekshe mán beretine nazar aýdardy
– Sizdiń kóregen kóshbasshylyǵyńyzben Rýanda damý dańǵylyna túsip, ınstıtýtsıonaldy ornyqtylyq pen bolashaqqa baǵdarlanǵan jańashyldyqtyń úlgisin kórsetti. Elińizdiń ekonomıkalyq ósimi 8 paıyzdan asty. Bul – jańǵyrtýdyń jarqyn kórinisi. Osy oraıda Sizdiń elińizben yntymaqtastyqty damytýǵa aıryqsha mán beremiz. Qazaqstan ekijaqty tıimdi baılanystardy naqty jobalar arqyly ilgeriletýge daıyn. Sizdiń saparyńyz barysynda qol jetkizilgen ýaǵdalastyqtar Qazaqstan men Rýanda arasyndaǵy qarym-qatynasty jańa deńgeıge kóteretinine senimdimin, – dedi Qasym-Jomart Toqaev.
Pol Kagame kórsetilgen syı-qurmet úshin rızashylyǵyn bildirip, Qazaqstannyń ekijaqty yqpaldastyqty damytýdaǵy kúsh-jigerine joǵary baǵa berdi. Sondaı-aq Rýanda men Qazaqstan arasyndaǵy seriktestiktiń áleýetine toqtalyp, eki eldiń órkendeýine jáne strategııalyq dıalogtyń nyǵaıýyna yqpal etetin birlesken jobalardy júzege asyrýǵa daıyn ekenin jetkizdi.
– Astanaǵa ekinshi márte jolym túskenine qýanyshtymyn. Qazaqstan ulttyq damý jolynda tolaıym tabysqa jetip, sonyń arqasynda halyqaralyq arenadaǵy róli artyp keledi. Biz Ózińizben jáne Sizdiń elińizben seriktes ári dostas bolǵanymyzǵa rızamyz, – dedi Rýanda Prezıdenti.
Memleketter basshylary ekijaqty yqpaldastyqtyń basym baǵyttaryn, sonyń ishinde saýda, ınvestıtsııa, kólik, aýyl sharýashylyǵy, aqparattyq tehnologııa, elektrondyq úkimet jáne qarjy salalaryndaǵy baılanystardy damytýǵa ýaǵdalasty.
Eske sala keteıik, buǵan deıin Qazaqstan men Rýanda Prezıdentteri birqatar saladaǵy qarym-qatynasty damytý máselesin talqylaǵanyn jazǵan edik.