Memleket basshysy Rojdestvo merekesimen quttyqtady

ASTANA. KAZINFORM – Memleket basshysy Qasym-Jomart Toqaev Rojdestvo merekesimen quttyqtady. Bul týraly Aqordanyń baspasóz qyzmeti habarlady.

Qurmetti otandastar!

Qazaqstannyń barsha pravoslav hrıstıandaryn Rojdestvo merekesimen quttyqtaımyn!

Bul jarqyn meıram adamdardyń júregine senim men úmit uıalatyp, barsha adamzatqa súıispenshilikpen qaraýǵa úndeıdi.

Ádildik, izgilik, shynaıylyq, jaýapkershilik, meıirimdilik, úılesimdilik sııaqty máńgilik rýhanı qundylyqtar hrıstıan dini men basqa da álemdik dástúrli dinderdiń arqaýy sanalady.

Pravoslav hrıstıandary elimizdegi konfessııaaralyq kelisimdi nyǵaıtýǵa, óskeleń urpaqty otanshyldyq pen eńbekqorlyqqa baýlýǵa jáne olardyń boıyna otbasy qundylyqtaryn sińirýge eleýli úles qosyp keledi.

Birlik, tilektestik, ózara qoldaý qaǵıdattary – memlekettik saıasatymyzdyń ajyramas bóligi, barlyq jetistikterimizdiń myzǵymas negizi.

Jurtymyz bir-birine qurmet kórsetip, senim men janashyrlyq tanyta otyryp, ádildik jáne ósip-órkendeý jolynda alǵa qaraı nyq qadam jasaı beredi.

Pravoslav azamattarǵa jáne barsha halqymyzǵa shyn júrekten zor densaýlyq, tolaǵaı tabys tileımin! Ár úı qut-berekege tolsyn! - delingen quttyqtaý mátininde.

Aıta keteıik, Hrıstıan álemindegi eń mańyzdy jáne saltanatty merekelerdiń biri — Rojdestvo merekesi. Ol Betlehem (Vıfleem) qalasynda Isa Másihtiń týǵan kúniniń qurmetine toılanady.

Ártúrli konfessııalardyń hrıstıandary Rojdestvony 25 jeltoqsanda nemese 6-7 qańtar kúni toılaıdy. Búginde bul 100-den astam elde resmı mereke bolyp sanalady.