Memleket basshysy Rhenus Group basqarma tóraǵasyn qabyldady
ASTANA. KAZINFORM – Qasym-Jomart Toqaev pen Tobıas Bartts kólik-logıstıka salalaryndaǵy strategııalyq seriktestikti damytý perspektıvasyn, sondaı-aq birlesken ınfraqurylymdyq jobalardy iske asyrý jaıyn talqylady. Bul týraly Aqorda habarlady.
Memleket basshysy kompanııanyń Qazaqstandaǵy kólik baılanysyn nyǵaıtýǵa uzaq jyldan beri úles qosyp kele jatqanyn atap ótti. Sonymen qatar elimiz qurlyqtyń negizgi logıstıkalyq habyna aınalýdy maqsat etip otyrǵanyn aıtty.
Kezdesýde Transkaspıı halyqaralyq kólik baǵytyn damytýǵa basa nazar aýdaryldy. Qasym-Jomart Toqaev zamanaýı úlgidegi porttary, termınaldary, temirjoldary men tsıfrlyq servısteri bar básekege qabiletti logıstıkalyq baǵytty birlese qalyptastyrýǵa shaqyrdy. Sondaı-aq Rhenus Group kompanııalar tobynyń Aqtaý portyndaǵy mýltımodaldy hab qurylysyna qatysýyn quptady.
Tobıas Bartts Qazaqstannyń negizgi kólik-logıstıka toraby retinde áleýeti zor ekenine toqtalyp, kompanııanyń birlesken jobalarǵa atsalysýǵa nıetti ekenin jetkizdi.
Taraptar ózara tıimdi yntymaqtastyq baǵyttaryn keńeıtýge ázirligin rastady.
Prezıdent Germanııanyń ekonomıkalyq qaýymdastyqtary men qarjy ınstıtýttary jetekshilerimen kezdesken bolatyn.
