Memleket basshysy Reseı Prezıdenti Vladımır Pýtınmen kezdesti
ASTANA. KAZINFORM — Kezdesý barysynda memleketter basshylary ekijaqty kún tártibindegi aýqymdy máselelerdi talqylady. Qasym-Jomart Toqaev Vladımır Pýtınge Omby tórinde qonaqjaılyq tanytqany úshin alǵys aıtty. Bul týraly Aqorda málim etti.
Sonymen qatar HHІІ óńiraralyq yntymaqtastyq forýmy aıasyndaǵy búgingi júzdesý Qazaqstan-Reseı yqpaldastyǵynyń negizgi baǵyttaryndaǵy jan-jaqty dıalogty jalǵastyryp, aldaǵy qadamdardy naqtylaýǵa múmkindik beretinin jetkizdi.
— Biz — asa iri saýda seriktesterimiz. Byltyr saýda kólemi shamamen 28 mıllıard dollardy qurady. Bıylǵy betalysymyz da óte jaqsy. Ótken jylǵy sáıkes kezeńmen salystyrǵanda, bıyl bes aıda ózara saýda kóleminiń qarqyny aıtarlyqtaı arta tústi. Reseı ekonomıkamyzǵa ınvestıtsııa salatyn elderdiń arasynda kósh bastap tur. Investıtsııa kólemi shamamen 30 mıllıard dollarǵa jetti. Birlesken kúsh-jigerdiń arqasynda jalpy quny 53 mıllıard dollar bolatyn 177 perspektıvti ónerkásip jobasynyń tizimi jasaqtaldy. Onyń 122-si iske asyryldy. Qazirgi kúrdeli geosaıası jaǵdaıdy eskersek, bul — kóńil qýantatyn jetistik, — dedi Qazaqstan Prezıdenti.
Memleket basshysy gýmanıtarlyq saladaǵy yqpaldastyq deńgeıin joǵary baǵalady. Sondaı-aq Qazaq ulttyq ýnıversıtetiniń Ombydaǵy fılıalyn ashýǵa qoldaý bildirgeni úshin Reseı memleketiniń basshysyna rızashylyǵyn bildirdi. Qasym-Jomart Toqaev Qazaqstandaǵy alǵashqy atom elektr stantsııasyn birlese salý jobasynyń aǵymdaǵy jaǵdaıy týraly pikir bildirdi.
— Maǵan Balqash kóli mańynda nysan ornyn daıyndaý jumystary aıaqtalýǵa jaqyndaǵanyn baıandady. Bul joba Qazaqstan aýmaǵynda energııanyń jańa túrin óndirýge ǵana qatysty emes. Ol sonymen qatar memleketterimizdiń, eń bastysy, halyqtarymyzdyń jáne óskeleń urpaqtyń arasynda altyn kópir bolady. Óıtkeni biz Reseı kómegimen tehnıkalyq kadrlardy, keıin atom ındýstrııasy sııaqty asa kúrdeli salada jumys isteıtin jergilikti qazaq mamandaryn daıarlaǵymyz keledi, — Qasym-Jomart Toqaev.
Aıta keteıik, Prezıdent Qazaqstan–Reseı óńiraralyq yntymaqtastyq forýmyna qatysý úshin Ombyǵa bardy.
