Memleket basshysy Reseı Prezıdenti Vladımır Pýtınmen kelissóz júrgizdi
Reseı gazyn elimizdiń aýmaǵy arqyly Ózbekstan Respýblıkasyna tasymaldaý jobasyn iske qosý rásiminen keıin Qasym-Jomart Toqaev pen Vladımır Pýtın kelissóz júrgizdi, dep habarlaıdy Aqordanyń baspasóz qyzmeti.
Kezdesý barysynda memleket basshylary eki eldiń strategııalyq seriktestiginiń qazirgi jaı-kúıi men qatynastardy odan ári nyǵaıtý perspektıvalaryn talqylady. Sondaı-aq, saýda-ekonomıka, energetıka, kólik-logıstıka jáne basqa da salalardaǵy yqpaldastyqty jalǵastyrý mańyzdy ekenin atap ótti.
Qasym-Jomart Toqaev ǵasyrlar boıy dostyq pen tatý kórshilik qatynastarǵa negizdelgen Qazaqstan men Reseı arasyndaǵy baılanystar qarqyndy damyp kele jatqanyna toqtaldy.
– Memleketterimizdiń yntymaqtastyǵy kópjaqty sıpatta tabysty damyp keledi. Elderimiz arasyndaǵy yqpaldastyq, eń aldymen, túrli saladaǵy strategııalyq jáne odaqtastyq qatynastarǵa negizdelgen. Búgin biz iri jobany iske qosý rásimine qatystyq. Shyn máninde, bul tsıfr turǵysynan aıtarlyqtaı úlken bolmasa da, qysqa merzim ishinde aýqymdy jumys atqaryldy. Árıne, munyń sımvoldyq máni keleshekte de zor bolady, – dedi Memleket basshysy.
Óz kezeginde Vladımır Pýtın joǵary deńgeıdegi ekijaqty qatynastardy odan ári nyǵaıtý qajet ekenine nazar aýdardy.
– Sizdiń Máskeýge jasaǵan saparyńyz – aıtýly oqıǵa. Arnaıy kelgenińiz, sondaı-aq búgin tanystyrylǵan jobany birge iske asyrǵanymyz úshin Sizge rızashylyǵymdy bildiremin. Árıne, bul bastamasy ǵana dep oılaımyn. Áıtse de, jalpy aımaqtyń energetıka salasyndaǵy yntymaqtastyǵyna baǵyttalǵan alǵashqy ári asa mańyzdy qadam. Birlese atqaratyn jumys kóp. Barlyq baǵyt boıynsha qatynastarymyz jaqsy damýda. Bul úshin Sizge alǵys aıtqym keledi, – dedi Reseı Prezıdenti.
Áńgimelesý barysynda Qasym-Jomart Toqaev Vladımır Pýtındi týǵan kúnimen quttyqtap, Qazaqstan men Reseıdiń strategııalyq seriktestigin jáne Eýrazııa keńistigindegi kópjaqty ıntegratsııalyq baılanystardy keńeıtýge qosqan jeke úlesin atap ótti.
