Memleket basshysy Reseı Federatsııasynyń Prezıdentine quttyqtaý jedelhatyn joldady
ASTANA. KAZINFORM - Qasym-Jomart Toqaev Vladımır Pýtındi atalǵan eldiń memlekettik merekesi – Reseı kúnimen quttyqtady, dep habarlaıdy Aqordanyń baspasóz qyzmeti.
– Qazaqstan baýyrlas Reseımen strategııalyq seriktestik jáne odaqtastyq rýhynda dáıekti túrde damyp kele jatqan dostyq ári tatý kórshilik qarym-qatynasty joǵary baǵalaıdy. Sizdiń jýyrda Qazaqstanǵa jasaǵan memlekettik saparyńyz aıryqsha mánge ıe. Onyń nátıjesi ózara tıimdi yntymaqtastyqtyń kókjıegin keńeıtip, aýqymdy jobalar men bastamalardy júzege asyrýǵa tyń serpin berdi. Birlesken kúsh-jigerimizdiń arqasynda Qazaqstan men Reseı arasyndaǵy memleketaralyq baılanystar aldaǵy ýaqytta barlyq salada qarqyndy damı beredi dep senemin, – delingen jedelhatta.
Qasym-Jomart Toqaev Vladımır Pýtınniń Reseı Federatsııasynyń ıgiligi men órkendeýi jolyndaǵy jaýapty memlekettik qyzmetine tolaıym tabys tiledi.
Osyǵan deıin Memleket basshysy Kanada General-gýbernatory Lýıza Arbýrdy quttyqtaǵan bolatyn.
