Memleket basshysy Reseı prezıdentimen kezdesti
SANKT-PETERBOR. KAZINFORM – Prezıdent Qasym-Jomart Toqaev Reseı Federatsııasynyń prezıdenti Vladımır Pýtınmenmen kezdesti. Bul týraly Aqordanyń baspasóz qyzmeti habarlady.
Óz kezeginde Qasym-Jomart Toqaev Qazaqstan Reseımen strategııalyq seriktestik jáne odaqtastyq baılanystarǵa erekshe mán beretinin erekshe atap ótti.
– Jańa jyl qarsańynda dástúrge aınalǵan Peterbordaǵy kezdesýimiz mazmundy ótti. Biz EAEO qyzmetine qatysty birqatar máseleni qarastyryp, sheshimder qabyldadyq. TMD formaty aıasyndaǵy yqpaldastyqtyń asa mańyzdy, ózekti máseleleri talqylandy. TMD – bedeldi ári zaman talabyna saı halyqaralyq uıym. Bıyl ózara yntymaqtastyǵymyz tabysty bolǵany sózsiz. Ekijaqty qarym-qatynas qarqyndy damyp keledi. 12 qarashada Reseıge jasaǵan memlekettik saparym óte nátıjeli ótti. Sol sapar barysynda qonaqjaılyq tanytqanyńyz úshin Sizge rızashylyǵymdy bildiremin. Qazaqstan Reseımen strategııalyq seriktestik jáne odaqtastyq baılanystarǵa erekshe mán beredi. Biz Qazaqstan men Reseı azamattarynyń kúndelikti turmys-tirshiligine qatysty máselelerde birge áreket etýimiz qajet. Yntymaqtastyǵymyz ben strategııalyq seriktestigimizdi nyǵaıtýǵa baǵyttalǵan ortaq jumysymyz qos halyqtyń túpki múddesine saı keledi, - dedi Memleket basshysy.
Al Vladımır Pýtın Qazaqstan jáne Reseı arasyndaǵy ózara baılanystardyń basym baǵyttaryn damytý úshin arnaıy kezdeskenine rızashylyǵyn bildirdi.
– Biz kesheden beri biraz jumys atqardyq. Búgingi beıresmı kezdesý barysynda UQShU, TMD aıasyndaǵy qyzmetimizdi jáne ekijaqty yntymaqtastyq jaǵdaıyn talqyladyq. Degenmen Sizben Qazaqstan jáne Reseı arasyndaǵy ózara baılanystardyń basym baǵyttaryn damytý úshin arnaıy kezdeskenime qýanyshtymyn. Meniń oıymsha, barlyq sala oń qarqynmen alǵa ilgerilep keledi. Eki el arasynda sheshilmegen nemese túıtkildi másele joq, - dedi Reseı prezıdenti.
Eske sala keteıik, buǵan deıin Prezıdent TMD-ǵa múshe memleketter basshylarynyń beıresmı kezdesýine qatysqanyn habarlaǵanbyz.