Memleket basshysy Qarmet metallýrgııalyq kombınatyna bardy
ASTANA. KAZINFORM – Qasym-Jomart Toqaevtyń Qaraǵandy oblysyna jumys sapary Temirtaý qalasyndaǵy Qarmet metallýrgııalyq kombınatyn aralap kórýden bastaldy.
Prezıdent №3 domna peshiniń jumysymen tanysty. Munda jylyna 3,8 mıllıon tonna shoıyn óndiriledi.
«Qarmet» aktsıonerlik qoǵamy Dırektorlar keńesiniń tóraǵasy Andreı Lavrentev pen kásiporynnyń bas dırektory Vadım Basın óndiristi damytý úshin atqarylǵan jáne júzege asyrylyp jatqan jobalar jóninde baıandady. Bul maqsatqa 3,5 mıllıard dollardan astam qarjy qarastyrylǵan. Budan bólek 500 mıllıon dollar shamasynda Kómir departamentindegi jáne 978 mıllıon dollar kóleminde Temir rýdasy departamentindegi jobalarǵa qosymsha ınvestıtsııa quıý josparlanǵan.
Kásiporyn ǵımarattar men nysandarǵa aýqymdy jóndeý jumystaryn júrgizip jatyr. Bıylǵy jańǵyrtý baǵdarlamasyna 100-den astam nysan engen. 50 myń sharshy metr shatyr aýystyrylýda. Sonymen qatar buǵan deıin qabyldanǵan «Tazalyq» baǵdarlamasyna sáıkes 120 sanıtarııalyq-turmystyq ǵımaratqa kúrdeli jóndeý júrgizile bastady.
Memleket basshysyna slıab pen blıým shyǵaratyn №2 konvertorlyq tseh pen metall ázirlemelerin úzdiksiz quıý mashınasynyń jumysy tanystyryldy. Kásiporyn basshylyǵy búginde mekemeniń tehnıkalyq jaǵdaıyn babynda ustap turý, jóndeý júıesin, sondaı-aq krıstaldandyrǵysh aınalym júıeleri men barlyq mashına segmentterin jetildirý basty mindet ekenin atap ótti. Kelesi jyly basqarý jáne gıdravlıka júıelerin jańǵyrtý jumystary atqarylmaq.
Andreı Lavrentevtiń aıtýynsha, iske asyrylyp jatqan jobalar kombınat jumysyn turaqtandyryp, kompanııanyń «5-9-5» baǵdarlamasynyń oryndalýyna boljam jasaýǵa múmkindik berdi.
Qabyldanǵan strategııaǵa sáıkes kásiporyn 2028 jylǵa qaraı jylyna 5 mıllıon tonna bolat shyǵarýdy, 9 mıllıon tonna kómir jáne 5 mıllıon tonna temir rýdasy kontsentratyn óndirýdi josparlap otyr. Bul 2023 jylǵy kórsetkishtermen salystyrǵanda orta eseppen 66 paıyz ósimdi qamtamasyz etedi.
Memleket basshysy kombınatty tabıǵı gazǵa kóshirý mańyzdy sheshim ekenin atap ótti. Bul bastapqy kezeńde qorshaǵan ortaǵa keletin zııandy 30 paıyzǵa tómendetýge múmkindik beredi. Bıyl kúzde Temirtaý qalasynda ekologııalyq taza kólik túri – tramvaı jelisi qalpyna keltiriledi. Prezıdent ónerkásip qaýipsizdigi, óndiristiń tıimdiligin arttyrý jáne jańǵyrtý, aımaqtyń ekologııalyq ahýalyn jaqsartý baǵytynda júzege asyrylyp jatqan jobalardyń merzimi men joǵary sapa standarttaryn qatań saqtaý qajet ekenine basa nazar aýdaryp, birqatar naqty tapsyrma berdi.
– Biz otandyq ınvestordy shaqyrý arqyly durys sheshim qabyldadyq. Olar birden iske kiristi. Kombınattaǵy jaǵdaı burynǵymen salystyrǵanda aıtarlyqtaı jaqsarǵan. Biraq munymen shektelýge bolmaıdy. Eń basty mindet – Qarmet kásipornynyń baıaǵy dańqyn qaıtaryp, áleýmettik máselelerdi sheshýge basa mán berý. Bul baǵyttaǵy jumys bastalyp ketti. Odan habardarmyn. Men kombınatqa jyl saıyn kelip, onyń damý barysymen tanysyp turamyn, - dedi Qasym-Jomart Toqaev.
Qazirgi kezde «Qarmet» aktsıonerlik qoǵamynda 34 myńnan astam jumysshy eńbek etedi. Metallýrgııalyq kombınattyń óndiristik qýaty jylyna 5,3 mıllıon tonna bolat óndirýge jetedi. Byltyr kásiporyn 2,9 mıllıon tonna daıyn ónim shyǵarǵan. Onyń 2,1 mıllıon tonnasy Reseı, Qytaı, Ózbekstan, Qyrǵyzstan, Tájikstan, Túrikmenstan, Grýzııa, Ázerbaıjan jáne Aýǵanstan elderine eksporttaldy.
Eske sala keteıik, buǵan deıin Memleket basshysy Qasym-Jomart Toqaevtyń Qaraǵandy oblysyna jumys saparymen kelgenin jazǵan edik.
