Memleket basshysy Qarmet konverter tsehynyń jumysymen tanysty
ASTANA. KAZINFORM — Qasym-Jomart Toqaevqa Qarmet bolat balqytý óndirisiniń negizgi býyny sanalatyn konverter tsehy jóninde baıandaldy, dep habarlaıdy Aqordanyń baspasóz qyzmeti.
Prezıdentke domna peshinde balqytylǵan shoıynnyń qalaı quryshqa aınalatyny, sodan keıin úzdiksiz quıý qondyrǵysyna jáne odan ári ılemdeýge jiberiletini kórsetildi.
Qarmet kompanııasy 2024 jyly № 1 jáne № 2 konverterlerde kúrdeli jóndeý júrgizip, korpýstardy tolyq aýystyrdy jáne anaǵurlym zamanaýı konstrýktsııalar ornatty.
Jańǵyrtý jumystary shyǵarylatyn ónim túrlerin kóbeıtip, qorytylǵan bolat kólemin ulǵaıtýǵa, qural-jabdyqtardyń senimdiligin arttyrýǵa múmkindik beredi.
Sonymen qatar tsehtaǵy birqatar tehnologııalyq úderisti tabıǵı gazǵa kóshirý isi jalǵasyp jatyr.
Qarmet dırektorlar keńesiniń tóraǵasy Andreı Lavrentev Memleket basshysyna óndiristik kórsetkishter ósimi jáne ınvestıtsııalyq baǵdarlamalardy júzege asyrý barysy týraly esep berdi.
2026 jyldyń qorytyndysy boıynsha 4 mıllıon tonna bolat, 3,6 mıllıon tonna kómir jáne 3,9 mıllıon tonna temir rýdasy kontsentratyn óndirý josparlanyp otyr.
Kompanııa jumysy bastalǵannan beri ınvestıtsııa kólemi 2,7 mıllıardtan asa dollardy qurady.
Bul qarajat óndiris qýatyn jańǵyrtýǵa jáne jańa ónerkásiptik nysan salýǵa baǵyttaldy.
Qarmet — elimizdegi tolyq óndiristik tsıklge ıe eń iri taý-ken-metallýrgııalyq kompanııasy.
Ortalyq Azııadaǵy óziniń kómir, temir rýdasy kenishteri jáne energetıkalyq bazasy bar, ıntegratsııalanǵan taý-ken-metallýrgııalyq keshen.
Kompanııada shamamen 35 myń eńbekker, sonyń ishinde 14 myńnan astam adam Temirtaýdaǵy metallýrgııa kombınatynda jumys isteıdi.
Osyǵan deıin Prezıdent Temirtaýdaǵy jańartylǵan tramvaı júıesimen tanysqanyn jazǵanbyz.
