Memleket basshysy prezıdentterdi Ortalyq Azııany órkendegen keńistik retinde saqtaýǵa shaqyrdy

ASTANA. KAZINFORM – Qasym-Jomart Toqaev prezıdentterdi Ortalyq Azııany qaýipsiz, yntymaǵy jarasqan ári órkendegen keńistik retinde saqtaý úshin barynsha kúsh-jiger jumsaýǵa shaqyrdy. Bul týraly Aqordanyń baspasóz qyzmeti habarlady. 

Prezıdent ataǵan taǵy bir mańyzdy mindet – jan-jaqty yqpaldastyqtyń berik ekonomıkalyq bazasyn qalyptastyrý. Keıingi jyldary bul baǵytta eleýli nátıjege qol jetkizildi. Óńir ishindegi saýda kólemi birtindep ulǵaıyp keledi. Bul kórsetkish 11 mıllııard dollarǵa jetti.

Memleket basshysy óz kezeginde taýar aınalymyn arttyrý jáne ony 15 mıllıard dollarǵa jetkizý mańyzdy ekenin atap ótti. 

 – Elderimizdiń ekonomıkasyn damytýǵa birlesken iri ınfraqurylym jáne kólik jobalary tyń serpin berer edi. Ózara tıimdi yntymaqtastyqtyń mundaı oń mysaldary aımaǵymyzda qazirdiń ózinde de bar. Máselen, Qyrǵyzstandaǵy Qambarata 1-GES-in, Tájikstandaǵy Rogýn GES-in, Qazaqstan, Ózbekstan jáne Tájikstannyń gaz jobalaryn, jańa kólik dálizderiniń qurylysyn, sondaı-aq basqa da mańyzdy jobalardy ataýǵa bolady. Budan bólek shekara mańy aýdandarynda saýda-logıstıka jelileri men ónerkásip habtaryn damytý mańyzdy. Aýyl sharýashylyǵy, logıstıka, toqyma jáne hımııa ónerkásibi, qurylys sekildi perspektıvti salalarda jańa kelisimder jasap, jan-jaqty seriktestigimizdi nyǵaıtý qajet, - dedi Qazaqstan Prezıdenti.