Toqaev Presight AI-dyń Qazaqstandaǵy tsıfrlyq sheshimderdi damytýǵa qosqan úlesin joǵary baǵalady
ASTANA. KAZINFORM — Memleket basshysy Presight AI basqarma tóraǵasy Tomas Pramotedhamdy qabyldady, dep habarlaıdy Aqordanyń baspasóz qyzmeti.
Prezıdent meımanǵa iltıpat kórsetip, Presight AI kompanııasymen yntymaqtastyq joǵary deńgeıde ekenin atap ótti.
Sondaı-aq kásiporynnyń elimizdegi jasandy ıntellekt salasyndaǵy sheshimderdi damytýǵa zor úles qosyp kele jatqanyna rızashylyq bildirdi.
Memleket basshysy naqty bastamalardy iske asyrý arqyly seriktestikti odan ári keńeıtýge aıtarlyqtaı áleýet bar ekenine toqtaldy.
Tomas Pramotedham Qasym-Jomart Toqaevqa kompanııanyń «Derekterdi óńdeý ortalyǵy alqaby» jobasyna qatysýǵa qyzyǵýshylyq tanytyp otyrǵanyn aıtty. Bul — jasandy ıntellekt, esepteýish qýat pen tsıfrlyq servıs ınfraqurylymyn damytýdy kózdeıtin arnaıy ekojúıe.
Sonymen qatar Smart City bastamasyna aıryqsha nazar aýdaryldy. Memleket basshysy kompanııanyń osyǵan deıin Astanada júzege asyrǵan jobasy oń nátıje kórsetip, halyqtyń qaýipsizdigi men turmys sapasyn jaqsartýǵa septigin tıgizgenin jetkizdi. Bul rette atalǵan sheshimdi Almaty qalasyna engizý perspektıvasy qarastyryldy.
Budan buryn Toqaev Dubai World Trade Center basshylyǵymen tsıfrlyq ekonomıkany damytý máselesin talqylaǵanyn jazǵanbyz.
