Memleket basshysy Premer-mınıstrdiń orynbasary Qanat Bozymbaevty qabyldady
ASTANA. KAZINFORM – Qasym-Jomart Toqaevqa óńirlerdi damytý boıynsha qolǵa alynǵan sharalar týraly esep berildi. Memleket basshysynyń tapsyrmalaryn oryndaý maqsatynda Óńirlik saıasat jónindegi jobalyq keńse quryldy. Bul týraly Aqordanyń baspasóz qyzmeti habarlady.
Qanat Bozymbaev Óńirlik standarttar júıesin engizý jóninde baıandady. Bul oblystar arasyndaǵy jáne aımaq ishindegi ınfraqurylymǵa qol jetkizý barysynda baıqalatyn teńsizdikti tómendetýge, eldi mekenderdi damytýdy tıimdi josparlaýǵa múmkindik beredi.
Qasym-Jomart Toqaevqa energetıkalyq jáne kommýnaldyq sektorlardy jańǵyrtý boıynsha Ulttyq jobanyń júzege asyrylýy jóninde aqparat berildi. Joba aıasynda 86 myń shaqyrym kommýnaldyq jeliniń qurylysy men jańǵyrtý jumystary jáne jalpy qýaty 7,3 GVt bolatyn qosymsha generatsııa kózderin iske qosý qarastyrylǵan. Osy rette otandyq taýar óndirýshilerdiń turǵyn úı-kommýnaldyq sharýashylyq jáne energetıka salalaryndaǵy áleýeti barynsha paıdalanylady.
Sondaı-aq Memleket basshysyna turǵyndardy sý jáne káriz júıesimen sapaly ári úzdiksiz qamtamasyz etý úshin kommýnaldyq júıelerdi basqarý boıynsha transulttyq kompanııalarmen kelissózder júrgizilgeni jóninde aıtyldy.
Prezıdent óńirlerdi teńgerimdi damytý mańyzdy mindetterdiń biri ekenin atap ótti.
Qasym-Jomart Toqaev ınjenerlik-kommýnaldyq ınfraqurylymdy jańǵyrtý, turǵyn úı-kommýnaldyq sharýashylyǵyna biryńǵaı tsıfrly ekojúıe engizý, sý salasyn tsıfrlandyrý jáne sý únemdeý tehnologııalaryn qoldaný jóninde birqatar naqty tapsyrma berdi.
Aıta keteıik, Prezıdent Salyq kodeksine túzetý engizetin zańǵa qol qoıdy.