Toqaev Úkimetke áleýmettik jáne ınfraqurylymdyq nysandar salýdy jedeldetýdi tapsyrdy
ASTANA. KAZINFORM – Qasym-Jomart Toqaev Qazaqstan Respýblıkasynyń bıylǵy qańtar-maýsym aılaryndaǵy áleýmettik-ekonomıkalyq damý qorytyndylary týraly esepti tyńdap, ekonomıkany odan ári ártaraptandyrý josparymen tanysty. Bul týraly Aqordanyń baspasóz qyzmeti habarlady.
Premer-mınıstr birinshi jartyjyldyq qorytyndysy boıynsha ishki jalpy ónim kólemi 4,1 paıyzǵa óskenin baıandady. Ekonomıka qurylymyndaǵy óńdeý ónerkásibiniń úlesi – 9,8 paıyzǵa, kólik salasy – 7,1 paıyzǵa, qurylys 15,2 paıyzǵa artty. Sondaı-aq saýda-sattyqta – 5,7 paıyz, aýyl sharýashylyǵynda – 4,4 paıyz jáne baılanys qyzmetinde 4,3 paıyz ósim tirkeldi. Negizgi kapıtalǵa tartylǵan ınvestıtsııa kólemi 9,5 trıllıon teńgeni qurady, sonyń ishinde jeke ınvestıtsııa 21,4 paıyzǵa ulǵaıdy.
Oljas Bektenov ulttyq ekonomıka qurylymyn nyǵaıtý jóninde esep berdi. Bıyl óńdeý sektorynda 1,7 trıllıon teńgege 200 ınvestıtsııalyq joba iske qosylyp, 17 myń jumys orny ashylady. Úkimet basshysy iri avtojol jobalarynyń júzege asyrylý barysy, Astana qalasyndaǵy ekinshi áýejaıdyń qurylysyn jáne Tarlan Astana kólik júıesiniń kelesi kezeńin josparlaý týraly aıtty. Paıdalanýǵa beriletin turǵyn úı kólemi 20 mıllıon sharshy metrge jetpek. Aýyl sharýashylyǵyndaǵy óndiris kórsetkishi 15 trıllıon teńgeni qurap, egistik alqaptary 23,8 mıllıon gektarǵa deıin ulǵaıdy. Sharýalardy qoldaýǵa 1 trıllıon teńge bólindi. Bul rette bıýdjettiń ár teńgesi 6,5 teńge jeke ınvestıtsııa tartýǵa septigin tıgizdi.
Memleket basshysyna Halyqtyń tabysyn arttyrý jónindegi keshendi jospardyń iske asyrylýy jáne ınflıatsııany tómendetý sharalary týraly aqparat berildi. Maýsym aıynda jyldyq ınflıatsııa deńgeıi 10,3 paıyzdy qurady.
Prezıdentke áleýmettik jáne kóshi-qon saıasatyn jetildirý nátıjeleri týraly baıandaldy, sondaı-aq jumysqa ornalasýǵa yntalandyrý arqyly áleýmettik qoldaý tetikteriniń tıimdiligin arttyrý tásilderi tanystyryldy. Keıbir áleýmettik tólemderdi ońtaılandyrý nátıjesinde jylyna 800 mıllıard teńgeden asa qarjy únemdeledi.
Kezdesýde jylytý maýsymyna daıyndyq máselesine aıryqsha nazar aýdaryldy. Ótken maýsymnyń qorytyndysy boıynsha bes jylý elektr ortalyǵy asa joǵary táýekeldiń «qyzyl» aımaǵynan shyǵarylyp, úsh JEO «jasyl» aımaqqa aýystyryldy. Bıylǵy jóndeý jumystary 9 energııa blogyn, 55 qazandyqty jáne 51 týrbınany qamtıdy. Atalǵan maqsatqa 384 mıllıard teńge bólingen. «Energetıkalyq jáne kommýnaldyq sektorlardy jańǵyrtý» ulttyq jobasy aıasynda jyl sońyna deıin 12 myń shaqyrym ınjenerlik jeli jóndeledi.
Prezıdentke tsıfrlandyrý jáne ulttyq AІ ınfraqurylymyn damytý jónindegi tapsyrmalarynyń oryndalýy týraly málimet usynyldy. Oljas Bektenov «Derekterdi óńdeý ortalyǵy alqaby» jobasyn iske asyrý maqsatynda álemdik ІT kóshbasshylarymen birge qýaty 250 MVt bolatyn ınfraqurylym jasaqtalatynyn aıtty. Shetelden tartylǵan ınvestıtsııa kólemi 10 mıllıard dollardan asty.
Memleket basshysyna týrızm ınfraqurylymyn jańǵyrtý jaıynda esep berildi. Almaty taý klasterin damytý týrızm salasynyń ІJÓ qurylymyndaǵy úlesin arttyrady. Almaty SuperSki jobasynyń qurylysy jandana tústi: 60 shaqyrym trassa qurylysy aıaqtalǵanda táýligine 10 myń adamǵa deıin qyzmet kórsetýge múmkindik týady. Nysandy paıdalanýǵa berý 2028 jyldyń jeltoqsan aıyna josparlanǵan. Elimiz «Bolashaq oıyndary-2026» jarystaryn ótkizýge daıyn.
Memleket basshysy jańa Konstıtýtsııaǵa saı qabyldanyp jatqan sharalar týraly habardar boldy. Zańnamany Ata zańǵa sáıkestendirý, «Ádiletti Qazaqstan» jáne «Zań men tártip» qaǵıdattaryn nyǵaıtý, áleýmettik saıasatty jetildirý, Alataý qalasyn qarqyndy damytý úshin quqyqtyq negiz qalyptastyrý, sondaı-aq «Taza Qazaqstan» bastamasyn ilgeriletý boıynsha jumystar júrgizilýde.
Kezdesý sońynda Qasym-Jomart Toqaev elimizdi órkendetý baǵytyndaǵy júıeli qadamdardy jalǵastyrýdy tapsyrdy. Úkimetke áleýmettik jáne ınfraqurylymdyq nysandar salýǵa arnalǵan aýqymdy baǵdarlamany qolǵa alý mindeti júkteldi. Bul bastama el azamattarynyń turmys sapasyn aıtarlyqtaı jaqsartýǵa tıis. Zamanaýı densaýlyq saqtaý nysandaryn salýǵa erekshe nazar aýdarylady.
