Memleket basshysy Premer-mınıstr Oljas Bektenovti qabyldady

ASTANA. KAZINFORM – Qasym-Jomart Toqaevqa elimizde ornyqty áleýmettik-ekonomıkalyq damýdy qamtamasyz etýge baǵyttalǵan ekonomıkany ártaraptandyrý jáne qurylymdyq jańǵyrtý boıynsha qabyldanyp jatqan sharalar týraly esep berildi. Bul týraly Aqordanyń baspasóz qyzmeti habarlady.

Мемлекет басшысы Премьер-министр Олжас Бектеновті қабылдады
Фото: Ақорда

Prezıdent tapsyrmalaryn júzege asyrý aıasynda jalpy ınvestıtsııa kólemi 2,3 trıllıon teńgeden asatyn ári shamamen 20 myń jumys ornyn qurýdy kózdeıtin 45 iri ónerkásiptik joba iske asyrylyp jatyr.

Premer-mınıstr Qaýipsizdik Keńesiniń otyrysynda kólik salasyn damytýǵa qatysty Memleket basshysy júktegen mindetterdi oryndaý boıynsha qolǵa alynǵan jumystar jóninde baıandady.

Prezıdentke vegetatsııalyq kezeń týraly málimet usynyldy. Egistikti sý resýrstarymen qamtamasyz etý, aýyl sharýashylyǵy máseleleri turaqty baqylaýǵa alynyp, sý únemdeý tehnologııalary engizilip jatyr. Óńirlik shtabtar jumys istep jatyr.

Memleket basshysyna egis naýqanynyń aıaqtalýy jáne jıyn-terim jumystaryna daıyndyq barysy jóninde aıtyldy. Elimizdegi jalpy egis alqaby 23,7 mıllıon gektardy qurady. Sharýalarǵa tolyq kólemde qoldaý kórsetilip jatyr. Jyl basynan beri aýyl, orman jáne balyq sharýashylyǵyndaǵy ónimder men qyzmetterdiń jalpy kólemi 4 paıyzǵa ósti. Barlyq óńirde oń dınamıka tirkeldi.

Sonymen qatar energetıkalyq jáne kommýnaldyq ınfraqurylymdy jańǵyrtý, tsıfrlyq transformatsııalaý jóninde aqparat berildi.

Kezdesý sońynda Qasym-Jomart Toqaev ekonomıkada ınstıtýtsıonaldyq ózgerister jasaýǵa, óńirlerdi damytýǵa jáne ınvestıtsııa tartýǵa qatysty birqatar tapsyrma berdi.

Aıta keteıik, Premer-mınıstr Oljas Bektenov Senat depýtattarynyń balalar ádebıetin damytýǵa arnalǵan ulttyq strategııa qabyldaý usynysyna jaýap berdi.

Сейчас читают