Memleket basshysy Premer-mınıstr laýazymyna Bektenov kandıdatýrasyn nelikten usynǵanyn aıtty

— Konstıtýtsııaǵa sáıkes Qazaqstan Respýblıkasynyń Úkimeti jańadan saılanǵan Quryltaı aldynda óz ókilettigin toqtatady. Sondyqtan biz osy jıynda Premer-mınıstrdiń kandıdatýrasyn bekitýimiz qajet. Men búgin Quryltaıǵa ótken partııalardyń fraktsııa jetekshilerimen birge osy máseleni talqyladym. Sol jıynda aıtylǵan pikirlerdi eskere otyryp, Úkimet basshysy laýazymyna Oljas Abaıuly Bektenovtiń kandıdatýrasyn usynamyn, — dedi Prezıdent.

Memleket basshysynyń paıymynsha, Oljas Bektenov memleketshil, tájirıbeli, bilikti azamat, jaýapkershiligin jaqsy túsinedi. Buǵan deıin Úkimet basshysy retinde nátıjeli jumys istedi.

— Qazir elimizdiń aldynda aýqymdy mindetter turǵanyn jaqsy bilesizder. Bul másele boıynsha Quryltaıdyń tuńǵysh otyrysynda tolyǵymen aıttym. Qazaqstan úlken qurylys alańyna aınalýda. Túrli ınfraqurylymdyq jobalardy qolǵa aldyq. Alda áli kóp jumys istelýi kerek. Jalpy elimizdiń táýelsizdigi men egemendigin nyǵaıtýǵa, memleketimizdi odan ári damytýǵa qatysty máseleler áli de kún tártibinde tur. Bul máselelerdi oıdaǵydaı sátti sheshýimiz kerek, bárimiz birge. Quryltaı osy maqsatty júzege asyrýǵa óziniń qomaqty úlesin qosady dep úmittenemin. Memleket basshysynyń uzaq merzimdi strategııasyn júzege asyrý úshin Úkimet te, Quryltaı da tıimdi jumys isteý qajet. Osy asa mańyzdy ári jaýapty jumystyń bárin uıymdastyrýǵa Oljas Abaıuly Bektenovtiń qarym-qabileti jetedi dep senemin, — dedi Qasym-Jomart Toqaev.

Prezıdent Quryltaı depýtattary usynysyn qoldaıdy dep úmittenetinin aıtty.

— Búgin men atalǵan joǵary laýazymdarǵa qatysty kandıdatýralardy usyndym. Basqa da qurylymdardy jasaqtaý jumysy jalǵasady. Onyń bári Konstıtýtsııada kórsetilgen tártipke sáıkes júzege asyrylady, — dedi Memleket basshysy.

Osyǵan deıin Prezıdent Quryltaıda Premer-mınıstr laýazymyna kandıdatýra usyndy.