Memleket basshysy Premer-Mınıstr Álıhan Smaıylovty qabyldady

ASTANA. KAZINFORM — Prezıdentke Qazaqstannyń 2023 jylǵy damý qorytyndysy jáne áleýmettik-ekonomıkalyq saladaǵy reformalardyń júzege asyrylýy jóninde baıandaldy.

Premer-Mınıstrdiń aıtýynsha, el ekonomıkasynyń ósimi 5,1 paıyzdy quraǵan. Negizgi kapıtalǵa salynǵan ınvestıtsııa 13,7 paıyzǵa artyp, 39,5 mıllıard dollarǵa deıin jetti. Bul rette byltyrǵy 9 aıda shetelden 19,7 mıllıard dollar kóleminde tikeleı ınvestıtsııa tartylǵan. Shaǵyn jáne orta bıznes salasynda jumyspen qamtylǵandardyń sany 14 paıyzǵa (500 myń adamǵa) artyp, 4,3 mıllıon adamǵa deıin kóbeıdi. Úkimettiń Ulttyq bankpen jáne óńir ákimderimen birlese atqarǵan sharalarynyń nátıjesinde ınflıatsııa deńgeıi 2 ese, ıaǵnı 9,8 paıyzǵa deıin tómendedi.

Syrtqy taýar aınalymy 2,2 paıyzǵa ósip, 126 mıllıard dollardy qurady. Saýda balansynyń oń saldosy 16 mıllıard dollardan asty.

Memleket basshysyna Úkimet búkil áleýmettik mindettemelerdi ýaqytyly ári tolyq kólemde oryndap otyrǵany týraly málimet berildi. Ortaq zeınetaqy mólsheri byltyr 10,5 paıyzǵa, al jyl basynan beri taǵy da 9 paıyzǵa ındeksatsııalandy. Múmkindigi shekteýli azamattarǵa jáne asyraýshysynan aıyrylǵan adamdarǵa tólenetin járdemaqy 23 paıyzǵa ulǵaıdy. Jalpy, elimizdiń 4,5 mıllıon azamaty áleýmettik qoldaý sharalarymen qamtylǵan. Ol úshin bıýdjetten 4,6 trıllıon teńge bólingen.

Búginde Investıtsııalyq jobalardyń biryńǵaı pýlyn júzege asyrý jumystary jalǵasýda. Ótken jyldyń qorytyndysy boıynsha quny 1,8 trıllıon teńge bolatyn 298 joba iske qosyldy. Bıyl somasy 3,8 trıllıon teńgeni quraıtyn taǵy 326 jobany, sonyń ishinde óńdeý ónerkásibi salasynda quny 1,2 trıllıon teńge bolatyn 180 jobany iske asyrý josparlanyp otyr. Osy rette 15 myń jańa jumys orny ashylmaq.

Premer-Mınıstr kásipkerlikti damytý jáne ınvestıtsııalyq ahýaldy jaqsartý sharalary, energetıka jáne qurylys salalarynda reforma júrgizý, sondaı-aq agroónerkásip keshenine jańa ádisterdi engizý jumystary týraly aıtty.

Budan bólek, Prezıdentke turǵyn úı-kommýnaldyq ınfraqurylymdy jańǵyrtý, halyqqa qyzmet kórsetý sapasy men onyń senimdiligin arttyrý sharalary jóninde málimet berildi. Sondaı-aq Qasym-Jomart Toqaevqa «Ulttyq qor – balalarǵa» jobasynyń júzege asyrylý barysy, «Keleshek» biryńǵaı jınaqtaý júıesiniń engizilýi, densaýlyq saqtaý jáne týrızm salalarynyń damýy jaıynda baıandaldy.

Kezdesý sońynda Qasym-Jomart Toqaev elimizdi áleýmettik-ekonomıkalyq turǵydan odan ári damytý jóninde birqatar tapsyrma berdi.