Memleket basshysy Portýgalııa Prezıdentine kóńil aıtý jedelhatyn joldady

ASTANA. KAZINFORM — Memleket basshysy Lıssabon ortalyǵyndaǵy apatqa qatysty Portýgalııa Prezıdentine kóńil aıtý jedelhatyn joldady. Bul týraly Aqorda málim etti.

— Qasym-Jomart Toqaev Lıssabon ortalyǵyndaǵy apat saldarynan kóptegen adamnyń qaza tabýyna jáne jaraqat alýyna baılanysty Prezıdent Marselý Nýný Dýarte Rebelý de Soýza men barsha portýgal halqyna kóńil aıtty. Qazaqstan Prezıdenti baqılyq bolǵandardyń týystaryn sabyrǵa shaqyryp, zardap shekkenderdiń tez arada saýyǵyp ketýine tilektestigin jetkizgen, — delingen habarlamada. 

Eske sala keteıik, Portýgalııa bıligi kóptegen adam qaza taýyp, jaraqat alǵan «Glorııa» fýnıkýlerindegi apatqa baılanysty ulttyq aza tutý jarııalaǵan bolatyn.

3 qyrkúıekte Lıssabondaǵy týrıster arasynda tanymal «Glorııa» fýnıkýleri relsten shyǵyp ketken edi. Apattan 15 adam mert bolyp, 18 adam jaraqat aldy, sonyń ishinde beseýiniń jaǵdaıy aýyr ekeni habarlanǵan bolatyn.