Memleket basshysy Polsha Prezıdentine quttyqtaý jedelhatyn joldady

ASTANA. KAZINFORM —  Qasym-Jomart Toqaev Qazaqstan halqynyń jáne óziniń atynan Karol Navrotskııdi Polsha Respýblıkasynyń ulttyq merekesi – Táýelsizdik kúnimen quttyqtady. Bul týraly Aqordanyń baspasóz qyzmeti habarlady. 

Prezıdent Qazaqstan Polshany Eýropa Odaǵy men Shyǵys Eýropadaǵy mańyzdy seriktesi dep biletinin jáne eki el arasyndaǵy yntymaqtastyqtyń aıasy qarqyndy túrde keńeıip kele jatqanyn joǵary baǵalaıtynyn jazǵan. Sonymen qatar birlesken kúsh-jigerdiń arqasynda ózara tıimdi baılanys keleshekte de jetistikterge toly bolatynyna senim bildirdi.

Qasym-Jomart Toqaev Karol Navrotskııdiń asa jaýapty qyzmetine tolaıym tabys, al dostas Polsha halqyna qut-bereke tiledi. 

Aıta ketelik Prezıdent Qasym-Jomart Toqaevtyń Reseı Federatsııasyna memlekettik sapary qarsańynda «Rossııskaıa gazeta» basylymynda «Vechnaıa drýjba – pýtevodnaıa zvezda dlıa nashıh narodov» atty maqalasy jaryq kórdi.