Memleket basshysy Polsha prezıdentin saılaýdaǵy jeńisimen quttyqtady

ASTANA. KAZINFORM — Memleket basshysy Polsha prezıdentine quttyqtaý jedelhatyn joldady, dep habarlaıdy Aqordanyń baspasóz qyzmeti.

Qasym-Jomart Toqaev Karol Tadeýsh Navrotskııdi Polsha prezıdenti bolyp saılanýymen quttyqtady.

— Elińizdiń áleýmettik-ekonomıkalyq damýyn baıandy etip, halqyńyzdyń yrys-berekesin eseleý jolyndaǵy ıgi bastamalaryńyz ben qolǵa alǵan josparlaryńyzdyń tabysty júzege asýyna shynaıy tilektespin. Qazaqstan men Polsha arasyndaǵy dástúrli dostyq pen ózara túsinistik rýhyndaǵy qarym-qatynastardy odan ári nyǵaıtý maqsatynda Ózińizben birlese kúsh-jiger jumyldyrýǵa daıyn ekenimdi rastaımyn, — dep jazylǵan jedelhatta.

Qasym-Jomart Toqaev Karol Tadeýsh Navrotskııdiń asa jaýapty qyzmetine sáttilik, dostas Polsha halqyna qut-bereke tiledi.

Buǵan deıin Polshadaǵy prezıdent saılaýynyń ekinshi týryndaǵy daýystardyń 100 paıyzy óńdelgeni habarlandy. «Quqyq jáne ádilet» ókili K.Navrotskıı 50,89 paıyz (10 606 628 daýys), al onyń qarsylasy, Varshava meri Rafal Tshaskovskıı 49,11 paıyz (10 237 177 daýys) jınaǵany belgili boldy. Osylaısha Karol Navrotskıı Polshanyń jańa prezıdenti boldy.