Memleket basshysy Perınatologııa jáne balalar kardıohırýrgııasy ortalyǵynyń dırektory Gúlnar Nurlanovany qabyldady
Kezdesý barysynda Prezıdent ana men bala densaýlyǵyn saqtaý salasy memleketimizdiń basty basymdyǵy sanalatynyn atap ótti.
Qasym-Jomart Toqaev otandyq densaýlyq saqtaý júıesiniń aldynda júkti áıelder men balalarǵa medıtsınalyq kómektiń qoljetimdiligin ári sapasyn arttyrý, ana men bala ólimin azaıtý, balalardyń múgedektigin erte anyqtaý jáne aldyn alý jóninde mańyzdy mindetter turǵanyn aıtty. Memleket basshysy perzenthanalardyń ınfraqurylymyn nyǵaıtý jáne olardyń jumysyna ozyq standarttar men ádistemelerdi engizý qajettigine erekshe nazar aýdardy.
Gúlnar Nurlanova Perınatologııa jáne balalar kardıohırýrgııasy ortalyǵynyń qyzmeti men jetistikteri jáne júzege asyrylyp jatqan jobalary týraly málimet berdi. Sondaı-aq Ortalyq elimizdegi týa bitken júrek aýrýlary bar naýqastardy baqylaýdyń tolyq tsıkli júrgiziletin jalǵyz mekeme ekenin jetkizdi. Munda jyl saıyn 200 kardıohırýrgııalyq ota jasalady. Perzenthanada dúnıege keletin náresteler sany 9000-ǵa, onyń ishinde merziminen buryn týǵandar shamamen 3700-ge jetedi.
Prezıdentke fetaldi hırýrgııaǵa qatysty revolıýtsııalyq joba engizile bastaǵany jóninde baıandaldy. Medıtsınalyq kómektiń atalǵan baǵytyna sáıkes, týa bitken damý kemistikterin korrektsııalaý úshin balaǵa qursaq ishinde jatqanda operatsııa jasalady. Joba deni saý balany dúnıege ákelip, ana baqytyna bólenýge múmkindik beredi.
Qasym-Jomart Toqaev dárigerlerdi qoldaý máselelerine arnaıy toqtalyp, olardyń qoǵam úshin sińirip jatqan eńbegi mańyzdy ekenin atap ótti. Prezıdent bıyl medıtsına qyzmetkerleriniń múddesin qorǵaýǵa jáne dáriger qyzmetiniń mártebesin arttyrýǵa baǵyttalǵan zańǵa qol qoıǵanyn eske saldy. Sonymen qatar alǵash ret «Qazaqstannyń eńbek sińirgen dárigeri» memlekettik nagradasy bekitildi.
Qasym-Jomart Toqaev Gúlnar Nurlanovaǵa jáne barlyq dárigerlerdiń ıgilikti jumysyna tabys tiledi.
