Memleket basshysy Pavlodar oblysynyń ákimi Asaıyn Baıhanovty qabyldady

ASTANA. KAZINFORM – Asaıyn Baıhanov oblystyń byltyrǵy áleýmettik-ekonomıkalyq damýy týraly esep berdi. Bul týraly Aqordanyń baspasóz qyzmeti málim etti. 

Asaıyn Baıhanovtyń málimdeýinshe  oblys ekonomıkasyna 965 mıllıard teńge ınvestıtsııa tartylǵan. Bul 2022 jylmen salystyrǵanda 26 paıyzǵa kóp. 

Oblys ákiminiń málimetinshe,  jolaýshylar tasymaly sektorynda 31 paıyz, mashına jasaý isinde 13 paıyz, qurylys salasynda 8 paıyz ósim baıqalady. 73 shaqyrymnan astam jylýmen qamtý jelisine rekonstrýktsııalaý jumystary júrgizilgen.  Ekibastuz jylý elektr ortalyǵyndaǵy barlyq 10 qazandyq agregat jóndelgen.  tehnıkalyq sýǵa arnalǵan 11 shaqyrym jańa qubyr tartylyp, 5,4 shaqyrym magıstraldy jylýmen qamtý jelisine rekonstrýktsııa jasalǵan. 

Budan ózge oblystaǵy aýyldarda úsh zamanaýı mekteptiń salynýy apatty jaǵdaıdaǵy mektepterge qatysty máseleni sheshýge múmkindik bergen. Óńirde 54 bilim berý uıymy tolyqtaı jańǵyrtylǵan. Eki jyl ishinde «Aýyldyq densaýlyq saqtaýdy jańǵyrtý» ulttyq jobasy aıasynda 30 jańa medıtsınalyq nysan salynady. 

«Oblysta qoǵamdyq kólik júıesin kezeń-kezeńimen jańǵyrtý jumystary bastalǵan. Byltyr qalalyq avtobýs parki 130 jańa avtobýspen tolyqtyrylǵan. Sondaı-aq 722 shaqyrym avtojol jóndelgen. Byltyr 37 myńnan astam halqy bar 44 aýylǵa jańa sý qubyry tartylǵan. Osylaısha, oblystaǵy aýyl turǵyndarynyń 98 paıyzyna taza aýyzsý jetkizilgen» - delingen habarlamada. 

Qasym-Jomart Toqaev oblys ákimine Ertis óńirin áleýmettik-ekonomıkalyq turǵydan odan ári damytý jóninde birqatar tapsyrma berdi.