Memleket basshysy Pákistan Prezıdenti Asıf Alı Zardarımen kelissóz júrgizdi
ISLAMABAD. KAZINFORM — Qasym-Jomart Toqaev Islamabad qalasynda ózine jáne Qazaqstan delegatsııasyna qonaqjaılyq kórsetkeni úshin Asıf Alı Zardarıge alǵys aıtyp, sapardyń joǵary deńgeıde uıymdastyrylǵanyn atap ótti, dep habarlaıdy Aqordanyń baspasóz qyzmeti.
Prezıdent otyz jyldan astam ýaqyt ishinde Qazaqstan men Pákistan mazmundy saıası dıalog órbitip, túrli salada ekijaqty yntymaqtastyqty dáıekti túrde nyǵaıtyp kele jatqanyna toqtaldy.
Qasym-Jomart Toqaevtyń pikirinshe, Qazaqstan – jer aýmaǵy men ekonomıkalyq áleýeti turǵysynan Ortalyq Azııadaǵy eń iri el. Al Pákistan Ońtústik Azııa, Ortalyq Azııa, sondaı-aq Taıaý Shyǵys túıisken tusta tıimdi ornalasqan. Bul – uzaq merzimdi strategııalyq maqsattarǵa qol jetkizýge yqpal etetin mańyzdy geosaıası artyqshylyq.
Memleket basshysy Premer-mınıstr Shahbaz Sharıfpen júrgizgen kelissózder nátıjesinde Astana men Islamabad arasyndaǵy qarym-qatynasty jańa strategııalyq deńgeıge kóterý jónindegi Birlesken deklaratsııaǵa qol qoıylǵanyn atap ótti. Bul qadam baýyrlastyq baılanystardy tolyq aıqyndap, eki eldiń barlyq baǵyt boıynsha yqpaldastyqty udaıy keńeıtýge beıil ekenin baıqatady.
Asıf Alı Zardarı eki el arasyndaǵy yntymaqtastyqtyń damý deńgeıin joǵary baǵalap, Pákistan tarapynyń ózara tıimdi yqpaldastyqty odan ári nyǵaıtýǵa nıetti ekenin rastady.
Taraptar ekijaqty kún tártibiniń ózekti máseleleri jóninde pikir almasyp, uzaq merzimdi qarym-qatynasty keńeıtýdiń jańa baǵyttaryn belgiledi. Qasym-Jomart Toqaev sapar qorytyndysy qos halyqtyń órkendeýi jolynda Qazaqstan men Pákistan arasyndaǵy seriktestikke tyń serpin beretinine senim bildirdi.
Budan buryn Qasym-Jomart Toqaev pen Shahbaz Sharıf Qazaqstan-Pákistan bıznes forýmyna qatysty. Onyń qorytyndysy boıynsha 200 mln dollarǵa jýyq 30-dan asa kelisim jasaldy.