Memleket basshysy Pákistan Premer-mınıstri Shahbaz Sharıfke hat joldady
ASTANA. KAZINFORM – Qasym-Jomart Toqaev Pákistan Islam Respýblıkasynyń Premer-mınıstri Shahbaz Sharıfti AQSh pen Iran arasyndaǵy Ózara túsinistik týraly memorandýmnyń qol qoıylýyna dáneker bolǵan dıplomatııalyq áreketiniń nátıjeli aıaqtalýymen quttyqtady, dep habarlaıdy Aqorda.
Prezıdent osy tarıhı kelisimge qol jetkizýge yqpal etken Pákistannyń konstrýktıvti rólin joǵary baǵalap, Shahbaz Sharıftiń kóregen kóshbasshylyǵyn jáne onyń qaqtyǵystardy beıbit jolmen sheshý qaǵıdatyn dáıekti túrde jaqtaıtynyn atap ótti.
Memleket basshysy atalǵan ýaǵdalastyq Taıaý Shyǵysta jáne tutas álemde uzaqmerzimdi turaqtylyqty qamtamasyz etý turǵysynan aıryqsha mánge ıe ekenine nazar aýdardy.
Sondaı-aq Prezıdent Islamabad óńirlik qaýipsizdik pen memleketter arasyndaǵy senimdi nyǵaıtýǵa eleýli úles qosýyn jalǵastyra beretinine úmit artatynyn jetkizdi.
Qasym-Jomart Toqaev Qazaqstannyń Pákistanmen san qyrly yntymaqtastyqty odan ári keńeıtýge daıyn ekenin rastap, Premer-mınıstrdiń jaýapty qyzmetine tabys tiledi.
Aıta keteıik, búgin Prezıdent Atyraý, Jambyl, Mańǵystaý jáne Ulytaý oblystary ákimderine tapsyrma berdi.
