Memleket basshysy: Ozyq oıly ult bolý úshin jaǵymsyz ádetten túbegeıli arylýymyz kerek

ASTANA. KAZINFORM – Memleket basshysy Qasym-Jomart Toqaev «Zań jáne tártip» qaǵıdasy memlekettiń myzǵymas tuǵyry ekenin málim etti.

— Qoǵamda osy qaǵıdany túbegeıli ornyqtyrý úshin barlyq quzyrly organdar arasynda ortaq kózqaras pen ortaq ustanym bolýǵa tıis. Bul — eń aldymen, eshqandaı quqyq buzýshylyqqa jol bermeý qaǵıdasy, ıaǵnı kez kelgen zańsyzdyqqa qarsy turý degen ustanym. Sondyqtan memlekettik organdardyń osy baǵyttaǵy jumysyn barynsha qoldaý qajet. Sonda ǵana elimizde quqyq buzýshylyqqa, ozbyrlyq pen zorlyq-zombylyqqa qarsy sana-sezim qalyptasady, qoǵamǵa jat kez kelgen áreketke tózbeýshilik paıda bolady. Ashyǵyn aıtýymyz kerek, qazirgi tańda adamdarda dóreki sóılep, bir-birine eregisip, jaǵa jyrtysatyn ádet bar, — dedi Qasym-Jomart Toqaev Qazaqstan halqyna Joldaýynda. 

Memleket basshysy málim etkendeı, keleńsiz oqıǵalar ásirese, qoǵamdyq oryndarda, jol boıynda jıi bolady. 

— Ókinishke qaraı, solardyń ishinde aıqaı-shý shyǵaratyn, balaǵat sózder aıtyp, qoǵamdyq tártipti buzatyn áıelder de bar. Bul — mádenıetti, órkenıetti qoǵamǵa jaraspaıtyn qylyq, elimizdiń halyqaralyq qoǵamdastyqtaǵy bedeline zııan keltiretin qubylys. Ozyq oıly ult bolý úshin mundaı jaǵymsyz ádetten túbegeıli arylýymyz kerek, — dep naqtylady Prezıdent.

Buǵan deıin Memleket basshysy oblys ákimderiniń qarajatty tıimsiz jobalarǵa shashýdan árige barmaıtynyn synǵa aldy. 

Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.