Memleket basshysy Ózbekstannyń halyqaralyq bedeliniń artýyna senim bildirdi
BUHARA. KAZINFORM – Prezıdent beıresmı kezdesý barysynda tarıhı tyǵyz baılanystar Qazaqstan men Ózbekstan arasyndaǵy shynaıy strategııalyq seriktestik pen odaqtastyqtyń myzǵymas irgetasy ekenin eske saldy. Bul týraly Aqordanyń baspasóz qyzmeti habarlady.
– Ekijaqty qarym-qatynasymyzdyń buryn-sońdy bolmaǵan joǵary deńgeıge kóterilýine, qurmetti Shavkat Mıromonovıch, Sizdiń qosqan úlesińiz zor. Qazaqstan eń jaqyn kórshi ári odaqtas el retinde Sizdiń parasatty basshylyǵyńyzben júrgizilip jatqan aýqymdy saıası jáne ekonomıkalyq ózgeristerdi tolyq qoldaıdy. Ózińiz belgilegen strategııalyq baǵdar arqyly halqyńyzdyń ál-aýqaty udaıy jaqsaryp, iri ınfraqurylymdyq jáne áleýmettik jobalar iske asyrylýda. Bul jetekshi qarjy ınstıtýttarynyń reıtınginde oń baǵalanyp, elińizdiń halyqaralyq arenadaǵy bedeli artyp keledi. Sizdiń ulttyq múddeni kózdeıtin dáıekti saıasatyńyz Ózbekstannyń, sondaı-aq tutas aımaqtyń odan ári ósip-órkendeýine yqpal etedi dep senemin, - dedi Qasym-Jomart Toqaev.
Memleket basshysy Qazaqstanda jańa Konstıtýtsııa qabyldanýyna baılanysty Ózbekstan kóshbasshysynyń quttyqtaý joldaǵanyna alǵys aıtty. Prezıdent osy tarıhı oqıǵa kezinde shet memleketter basshylary arasynan Shavkat Mırzıeev alǵashqy bolyp quttyqtaǵanyn jetkizdi.
Buǵan deıin Qasym-Jomart Toqaev Ózbekstan prezıdentimen beıresmı kezdesý ótkizgenin jazǵan edik.
