Shavkat Mırzıeev qazaq elin jańa Konstıtýtsııa referendýmynyń tabysty ótýimen quttyqtady

ASTANA. KAZINFORM — Áńgimelesý barysynda Shavkat Mırzıeev Qasym-Jomart Toqaevty Qazaqstan Respýblıkasynyń jańa Konstıtýtsııasy jobasy boıynsha referendýmnyń tabysty ótýimen quttyqtady. Bul týraly Aqorda málim etti.

Ózbekstan Prezıdentiniń aıtýynsha, referendým nátıjesi Qasym-Jomart Toqaev júrgizip jatqan aýqymdy reformalarǵa Qazaqstan halqy zor senim artatynyn kórsetedi.

Memleket basshysy qoldaý bildirip, halyqaralyq uıymdar quramynda Ózbekstannan baıqaýshylar mıssııasyn jibergeni úshin Shavkat Mırzıeevke alǵys aıtty.

Qasym-Jomart Toqaev jańa Konstıtýtsııa zaman talabyna saı keletinine, sondaı-aq memlekettiń ornyqty jáne jan-jaqty damýyn qamtamasyz etetinine nazar aýdardy. Elimizde júrgiziletin aldaǵy jańǵyrtýlar kezinde halyqaralyq seriktestermen, ásirese, kórshiles jáne odaqtas eldermen yntymaqtastyqty nyǵaıtýǵa aıryqsha mán beriledi.

Taraptar strategııalyq seriktestik pen odaqtastyq rýhyndaǵy qazaq-ózbek qarym-qatynasy qarqyndy damyp kele jatqanyna toqtaldy.

Sondaı-aq buǵan deıin qol jetkizilgen kelisimder men Joǵary memleketaralyq keńes sheshimderiniń iske asyrylý barysyna oń baǵa berip, barlyq deńgeıdegi yqpaldastyqty jalǵastyrýǵa ýaǵdalasty.

Prezıdentter óńirlik jáne halyqaralyq kún tártibindegi ózekti máseleler jóninde pikir almasyp, aldaǵy kezdesýlerdiń kestesin pysyqtady.

Eske sala keteıik, buǵan deıin Prezıdent Qasym-Jomart Toqaev respýblıkalyq referendým barysynda júrgizilgen ekzıt-poll qorytyndysymen tanysyp, qazaq eli túbegeıli tarıhı tańdaýyn jasaǵanyn aıtty.