Memleket basshysy Ózbekstan Prezıdenti Shavkat Mırzıeevpen telefon arqyly sóılesti

ASTANA. KAZINFORM – Memleket basshysy Ózbekstan Prezıdentin týǵan kúnimen quttyqtap, onyń baýyrlas ózbek halqynyń ıgiligi jolynda atqaryp jatqan jaýapty memlekettik qyzmetine tolaıym tabys tiledi.

Qasym-Jomart Toqaev Shavkat Mırzıeevtiń bedeldi kóshbasshylyǵynyń arqasynda Ózbekstan damýdyń dańǵyl jolyna túsip, áleýmettik-ekonomıkalyq salada eleýli jetistikke jetkenin atap ótti. 

Áńgimelesý barysynda eki el arasynda senimge, tatý kórshilik baılanystarǵa ári ózara qoldaýǵa negizdelgen strategııalyq jáne odaqtastyq qatynastar qalyptasqanyna nazar aýdaryldy. Saýda-ekonomıkalyq, mádenı-gýmanıtarlyq yntymaqtastyq pen ǵylym-bilim salasyndaǵy seriktestik nyǵaıyp keledi.

Qasym-Jomart Toqaevtyń aıtýynsha, búkil Orta Azııanyń ornyqty damýy kóbine eki memlekettiń ózara yqpaldastyǵyna tikeleı baılanysty. Osyǵan oraı taraptar ónerkásip, energetıka, kólik, logıstıka jáne aýyl sharýashylyǵy baǵyttaryndaǵy birlesken jobalardy ilgeriletý úshin naqty sharalar qabyldap jatyr.

Qasym-Jomart Toqaev pen Shavkat Mırzıeev óńirlik kooperatsııanyń ózekti máseleleri jóninde pikir almasyp, ekijaqty formatta jáne halyqaralyq is-sharalar aıasynda josparlanǵan joǵary deńgeıdegi kezdesýler kestesin qarastyrdy.

Buǵan deıin Memleket basshysy Koreıa Prezıdenti Lı Chje Meńmen telefon arqyly sóılesken bolatyn.