Memleket basshysy Ózbekstan Prezıdenti Shavkat Mırzıeevpen telefon arqyly sóılesti
ASTANA. KAZINFORM – Shavkat Mırzıeev Qasym-Jomart Toqaevty Qazaqstan Respýblıkasy Quryltaıy depýtattarynyń alǵashqy saılaýy sátti ótýimen quttyqtady. Bul týraly Aqorda habarlady.
Qasym-Jomart Toqaev Shavkat Mırzıeevke qoldaýy men halyqaralyq uıymdar quramynda Ózbekstan baıqaýshylar mıssııasyn jibergeni úshin alǵys aıtty.
Prezıdent Ózbekstan kóshbasshysyna elimizde júrgizilip jatqan ishki saıası ózgerister týraly aıtyp, Quryltaı ozyq, zamanaýı jáne ádiletti Qazaqstan qurýǵa baǵyttalǵan saıası reformalardyń mańyzdy bóligi ekenine toqtaldy.
Taraptar dostyq pen strategııalyq seriktestik rýhynda udaıy nyǵaıyp kele jatqan qazaq-ózbek qarym-qatynasynyń damý barysyna kóńil tolatynyn atap ótti.
Áńgimelesý barysynda saýda-ekonomıkalyq yqpaldastyqty keńeıtýge, kólik-logıstıka, óndiristik kooperatsııa salalaryndaǵy birlesken ınvestıtsııalyq jobalardy júzege asyrýǵa, sondaı-aq Qazaqstan men Ózbekstan arasyndaǵy iskerlik toptardyń baılanysyn jandandyrýǵa basa nazar aýdaryldy.
Memleketter basshylary óńirlik jáne halyqaralyq kún tártibindegi ózekti máseleler jóninde pikir almasty.
Ózbekstan Prezıdenti Shavkat Mırzıeev Qazaqstan Respýblıkasynyń Prezıdenti Qasym-Jomart Toqaevqa hat joldap, halyqaralyq standarttar men demokratııalyq qaǵıdattarǵa saı eldiń jańarǵan Parlamenti — Quryltaıǵa baılanysty ótken saılaýdyń sátti uıymdastyrylýymen shyn júrekten quttyqtady.
