Memleket basshysy Ózbekstan Prezıdenti Shavkat Mırzıeevpen kelissóz júrgizdi
ASTANA. KAZINFORM — Qasym-Jomart Toqaev Shavkat Mırzıeevke Tashkentke memlekettik saparmen kelýge shaqyrǵany jáne dástúrli qonaqjaılyq tanytqany úshin rızashylyǵyn bildirdi. Bul týraly Aqordanyń baspasóz qyzmeti habarlady.
Kezdesý barysynda memleketter basshylary qazaq-ózbek strategııalyq seriktestigi men odaqtastyǵyn odan ári damytý perspektıvasyn egjeı-tegjeıli talqylady.
Prezıdentter saýda, ónerkásip kooperatsııasy, kólik-logıstıka, energetıka, aýyl sharýashylyǵy, sý resýrstary sekildi basym baǵyttardaǵy, sondaı-aq mádenı-gýmanıtarlyq salalardaǵy yqpaldastyqty nyǵaıtý máselelerin qarastyrdy.
Sonymen qatar óńirlik jáne halyqaralyq kún tártibiniń ózekti máseleleri jóninde pikir almasty.
Aıta ketelik Qasym-Jomart Toqaev Tashkentke memlekettik saparmen barǵan edi. Toqaev pen Mırzıeev «Tashkent-Hýmo» áýejaıynda áńgimelesti.