Memleket basshysy: Ótken jyly Assambleıa barlyq óńirde 15 myńnan astam is-shara uıymdastyrdy

ASTANA. KAZINFORM – Ótken jyly Assambleıa barlyq óńirde 15 myńnan astam is-shara uıymdastyrdy. Bul týraly Qazaqstan halqy Assambleıasynyń XXHІV sessııasynda Memleket basshysy Qasym-Jomart Toqaev aıtty.

- QHA músheleri kún saıyn kózge kórinbeıtin, birden nátıje bermeıtin, alaıda uzaq merzimdi, strategııalyq turǵydan tıimdi, aýqymdy jumys júrgizedi. Ótken jyldyń ózinde Assambleıa barlyq óńirde 15 myńnan astam is-shara uıymdastyrdy. Oǵan 1 mıllıonǵa jýyq adam qatysty. Byltyr kóktemgi sý tasqyny kezinde azamattarymyz zardap shekken jandarǵa kómek qolyn sozyp, yrysty yntymaq pen birliktiń tamasha úlgisin kórsetti. Assambleıanyń «Júrekten júrekke» jobasy aıasynda 12 myńnan astam erikti ortaq iske jumyla kiristi. Olar gýmanıtarlyq kómek pen jylý jınady. Qıraǵan úılerdi qalpyna keltirýge atsalysty, - dedi Qasym-Jomart Toqaev.

Memleket basshysy jalpy, el birligin nyǵaıtý isiniń strategııalyq mańyzy erekshe ekenin aıtty.

- Sonyń aıqyn dáleli retinde Assambleıanyń «El birligi» ordeni atty jańa memlekettik nagrada taǵaıyndaldy. «Birlik» uǵymy qazirgi dúnıe júzindegi turaqsyz jaǵdaıda asa mańyzdy. Álemde, ásirese, bizdiń aınalamyzdaǵy keıbir elderde ne bolyp jatqanyna bárimiz kýá bolyp otyrmyz. Sondyqtan shyn máninde, «Birlik bar jerde ǵana tirlik bar». Bul – aqıqat, - dedi Prezıdent.

Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.