Memleket basshysy otandyq JI jobalarymen tanysty
ASTANA. KAZINFORM – Prezıdent Qasym-Jomart Toqaevqa Ulttyq sýperkompıýter ortalyǵynda MedTech, EdTech, GovTech jáne ónerkásip salalaryndaǵy otandyq IT-sheshimder tanystyryldy. Bul týraly Aqordanyń baspasóz qyzmeti habarlady.
Atap aıtqanda:
SmartCity Astana jobasy ınnovatsııalyq tehnologııalardy engizý arqyly qaladaǵy ómir súrý sapasyn jaqsartýdy kózdeıdi. Jasandy ıntellektini qoldanatyn 100 myńnan asa beınebaqylaý kamerasy iske qosylyp, elordanyń tsıfrlyq syńary jasalady. Bul qoǵamdyq oryndardaǵy yqtımal táýekelderdi onlaın-rejımde anyqtap, jedel áreket etýge múmkindik beredi. Jobany jeke seriktes tolyǵymen qarjylandyrady.
AlemLLM jobasy – dáldigi joǵary qazaq tiliniń úlken til modeli. Jergilikti qoldanysqa beıimdelgen. Model balama sheshimderdiń arasynda úzdik kórsetkishterge ıe jáne túrli salada keńinen qoldanysqa arnalǵan.
AI Kitap jobasy – tsıfrlyq AI-oqýlyqtarǵa arnalǵan platforma. Ár oqýshynyń bilim deńgeıine, sabaq úlgerimine jáne jeke talǵamyna qaraı oqyta alady.
Baspana Hub – azamattardyń turǵyn úıge suranystaryn onlaın túrde sheshýge arnalǵan tsıfrlyq ekojúıe. Júıe arqyly marketpleısten úı izdep, satyp alýǵa, jyljymaıtyn múlikke qatysty memlekettik qyzmetterdi alýǵa, jóndeý jumystarynyń nemese qurylys materıaldarynyń onlaın-smetasyna tapsyrys berýge bolady. Joba syrttan qarjy, ınvestıtsııa tartpaı júzege asyrylǵan.
Biny.co – júk tasymaly salasyndaǵy otandyq startap. Komanda Google for Startups – Silkway Accelerator baǵdarlamasyna qatysyp, úzdik úshtikke engen. Ónimdi tutynýshylar qatarynda QazPost, Coca-Cola, Gorilla Asia jáne Zeta Trade kompanııalary bar.
Surfaice.pro – Kremnıı alqabyndaǵy qazaqstandyqtar negizin qalaǵan tehnologııalyq kompanııa. Startap qurylys salasyna arnalǵan ınnovatsııalyq sheshimder ázirleýmen aınalysady. AQSh-tyń bes shtatynda jumys isteıdi. Kompanııa Big Sky Capital jáne Shadow Ventures qorlarynan 1,5 mıllıon dollar ınvestıtsııa tartqan.
OlympIQ – sport salasyn damytýǵa arnalǵan tehnologııalyq platforma. Júıe JI kómegimen taldamalyq, operatsııalyq, medıtsınalyq jáne uıymdyq derekterdi óńdeýge múmkindik beredi.
Orman órtin aldyn ala anyqtaý júıesi órtke qarsy áreket etý ýaqytyn edáýir qysqartyp, apattyń aýqymy men shyǵynyn azaıtýǵa múmkindik beredi. Joba beınemonıtorıng, beınetaldaý jáne jasandy ıntellekt tehnologııalary negizinde jumys isteıdi. Atalǵan júıe «Býrabaı» memlekettik ulttyq tabıǵı parki men «Ertis ormany» rezervatyna engizilgen.
AI-hattama agenti – memlekettik organdardaǵy jınalystyń aýdıojazbalary negizinde transkrıptsııa jasap, hattama daıyndaıtyn jasandy ıntellekt qyzmeti. Joba qujat aınalymyn jedeldetýge, qol eńbegin azaıtyp, aqparattyń naqtylyǵy men saqtalýyn jaqsartýǵa baǵyttalǵan.
AI-Terapevt – daýys arqyly engizilgen aqparat negizinde medıtsınalyq qujattamany avtomatty túrde ázirleıtin JI júıesi. Atalǵan joba syrqattyń anamnezin qalyptastyryp, yqtımal dıagnozdy aldyn ala anyqtaı alady. Sondaı-aq tıisti klınıkalyq usynymdary bar medıtsınalyq esepti avtomatty túrde qurastyrady.
JI qoldaný arqyly radıologııalyq zertteýlerdi ortalyqtandyrý (PACS júıesi) jobasy onkologııalyq aýrýlardy erte kezeńinde anyqtaýǵa arnalǵan. Bul júıe medıtsınalyq keskinderdi saqtap, óńdeýge múmkindik beredi.
Eske sala keteıik, buǵan deıin Qasym-Jomart Toqaev sýperkompıýterdi iske qosý rásimine qatysqan bolatyn.