Prezıdent Óskemendegi Sáýlelik terapııa jáne dıagnostıka ortalyǵynyń jumysymen tanysty
ASTANA. KAZINFORM - Qasym-Jomart Toqaev Shyǵys Qazaqstan oblysyna jumys sapary barysynda Óskemen qalasyndaǵy kópbeıindi Onkologııa jáne hırýrgııa ortalyǵynyń bazasynda ashylǵan Sáýlelik terapııa jáne dıagnostıka ortalyǵyna bardy.
Bul týraly Aqordanyń baspasóz qyzmetinen habarlandy.
Prezıdentke joǵary dáldikpen dıagnostıka jasaýǵa jáne onkologııalyq aýrýlardy emdeýge múmkindik beretin sońǵy býyndaǵy magnıtti-rezonansty tomografııa (MRT), Elekta Versa HD jelilik údetkishi, Discovery RT kompıýterlik tomografy sııaqty zamanaýı medıtsınalyq qurylǵylardyń jumysy tanystyryldy. Sondaı-aq Ortalyq radıologııalyq sýretterdi saqtaýǵa jáne olardy tez taýyp, naqty ýaqyt rejıminde zertteýge arnalǵan PACS arhıvteý júıesimen jabdyqtalǵan.
Kópbeıindi onkologııa jáne hırýrgııa ortalyǵynyń dırektory Gúlmıra Saǵıdýllınanyń aıtýynsha, jyl saıyn munda 3 myńnan astam hırýgııalyq operatsııa jasalady, onyń 60 paıyzynda az ınvazıvti emdeý tásilderi qoldanylady. Ortalyqta medıtsına mamandarynyń shetelderde biliktiligin arttyrý jáne qaıta daıarlaý isine aıryqsha mán beriledi. Otandyq jáne sheteldik mamandar shaqyrylyp, turaqty túrde sheberlik saǵattary uıymdastyrylyp turady.
Qasym-Jomart Toqaevqa Shyǵys Qazaqstan oblysyndaǵy onkologııalyq qyzmettiń qazirgi jaı-kúıi jóninde baıandaldy. Óńirde qaterli isikterdi erte anyqtaý kórsetkishteri aıtarlyqtaı artyp, aýrý deńgeıi úshinshi, tórtinshi satyǵa deıin asqynyp ketken syrqattardyń sany qysqarǵan. Sáıkesinshe, onkologııalyq aýrýdan qaıtys bolatyn azamattardyń sany azaıyp kele jatqany baıqalady.
Memleket basshysy ortalyq dárigerlerimen áńgimelesip, medıtsınalyq uıymnyń jumysyna tabys tiledi. Sondaı-aq elimizde osyndaı zamanaýı medıtsınalyq ortalyqtar ashý mańyzdy ekenin atap ótti.
– Óte jaqsy medıtsınalyq mekeme eken. Zamanaýı ári sapaly quraldarmen jabdyqtalǵan. Naýqastardy emdeý kerek. Qazir mundaı aýrýhanalar jalpyulttyq mańyzǵa ıe boldy. Ókinishke qaraı, onkologııa derti júrek-qan tamyrlary aýrýlarynan keıin ekinshi orynda tur, – dedi Qasym-Jomart Toqaev.
Osyǵan deıin Qasym-Jomart Toqaevtyń Shyǵys Qazaqstan oblysyna jumys saparymen barǵany týraly jazdyq.
