Memleket basshysy «Ortalyq Azııa – Eýropa Odaǵy» sammıtine qatysý úshin «Kongress-ortalyqqa» keldi

SAMARQAND. KAZINFORM – «Ortalyq Azııa - Eýropa Odaǵy» formatyndaǵy alǵashqy sammıtke qatysatyn prezıdentter men sheteldik delegattar Samarqandtaǵy «Kongress-ortalyqqa» kelip jatyr, dep habarlaıdy Kazinform agenttiginiń menshikti tilshisi Álıhan Asqar.

Prezıdent Qasym-Jomart Toqaevty Ózbekstan basshysy Shavkat Mırzıeev qarsy aldy. Birlesken sýretke túsý rásiminen soń Memleket basshysy sammıt ótetin negizgi zaldaǵy ornyna jaıǵasty.

Aıta keteıik, keshe Prezıdent Qasym-Jomart Toqaev Ózbekstanǵa keldi. Jumys sapary aıasynda ol Eýropalyq keńes prezıdenti Antonıý Koshta, Eýropalyq komıssııa prezıdenti Ýrsýla fon der Lıaıen, Eýropalyq qaıta qurý jáne damý bankiniń prezıdenti Odıl Reno-Bassomen kezdesti.

Keıin Memleket basshysy Ózbekstan prezıdenti Shavkat Mırzıeevpen júzdesip, eki el arasyndaǵy yntymaqtastyqty tereńdetý múmkindigin talqyldy. Taraptar Halyqaralyq ónerkásiptik kooperatsııa ortalyǵyn iske qosý jumysyn jedeldetýge ýaǵdalasty.

Búgingi sammıt aıasynda kólik-logıstıkalyq jobalardy birlesip qolǵa alý, strategııalyq shıkizat baǵytyndaǵy seriktestik, ekologııalyq taza jáne tıimdi energııa óndirý kózderin engizý múmkindikteri talqynalady.

Buǵan deıin is-sharaǵa qatysty pikir bildirgen Eýropalyq keńes prezıdenti Antonıý Koshta «Ortalyq Azııa - Eýropa Odaǵy» sammıti óńir elderi men eýroaımaq memleketteriniń ornyqty damýyna tirek bolatyn yntymaqtastyq baǵytyn aıqyndaıtyn alań bolatynyn málimdedi.

Eske salaıyq, keshe Kazinform agenttiginde «Ortalyq Azııa – Eýropa Odaǵy» sammıtine Samarqand qalasynyń qalaı daıyndalyp jatqany jaıly fotoreportaj jarııalandy.