Memleket basshysy: Orta derjavalar men damýshy elderdiń Keńestegi úni anyq estilýi qajet
SINGAPÝR. KAZINFORM – Memleket basshysy túrli jahandyq túıtkilderdi sheshý isine Sıngapýr dıplomatııasynyń eleýli úles qosyp otyrǵanyn aıtty.
– Sıngapýr 2015 jyly QHR Tóraǵasy Sı Tszınpın men Taıvannyń burynǵy Prezıdenti Ma Intszıý arasyndaǵy búkil álem kóz tikken kezdesýdi jáne AQSh pen Soltústik Koreıa arasyndaǵy tarıhı sammıtti uıymdastyrýǵa uıytqy boldy. Biz muny óte joǵary baǵalaımyz, - dedi Prezıdent.
Áıtse de Prezıdent tıimdi jumys isteıtin kópjaqty yntymaqtastyq júıesin daýlardy beıbit jolmen sheshýge tyrysqan eshqandaı «izgi amal» almastyra almaıdy dep sanaıdy.
– Soǵysty toqtatýǵa tyrysqannan góri, onyń aldyn alýǵa tıispiz. Ondaǵan jyldar buryn biz Qyrǵı-qabaq soǵystan keıingi jylymyq kezeńdi sonshalyqty úmitpen qarsy aldyq, múmkindikter men órkenıet jetistikterine toly keleshekti kózimizge elestettik. Alaıda búgingi qara bulttaı úıirilgen qaýip-qater men tula boıyńdy titirkendiretin mazasyzdyq sezimi osy sáýleli oıǵa kóleńke túsirgendeı kórinedi. Kópjaqty ınstıtýttardyń abyroı-bedelin qalpyna keltirip, mýltılateralızmge tyń serpin berý úshin olardy jańǵyrtqan jón. Ony kópten beri pisip-jetilgen BUU reformasynan bastaý kerek. Qaýipsizdik Keńesine jan-jaqty reforma júrgizbeıinshe, biz bul mindetti oryndaı almaımyz. Bul – keıinge qaldyrýǵa bolmaıtyn ári adamzat balasynyń basym bóliginiń múddesimen saı keletin ýaqyt talaby. Orta derjavalar men damýshy elderdiń Keńestegi úni anyq estilýi qajet. Men buǵan kámil senemin, - dedi Qasym Jomart Toqaev.
