Memleket basshysy óńirlik júk avıahabtaryn damytý jóninde keńes ótkizdi
ASTANA. KAZINFORM — Prezıdent avıahabtardy damytý kólik-tasymal salasyndaǵy basym baǵyttardyń biri sanalatynyna toqtaldy, dep habarlaıdy Aqordanyń baspasóz qyzmeti.
— Kúlli álem elderi tranzıttik múmkindikterin arttyrýǵa erekshe mán berip otyr. Halyqaralyq básekelestik kúsheıe tústi. Qazir Qazaqstan arqyly jóneltiletin júk, negizinen, avtomobıl jáne temirjol arqyly tasymaldanady. Biraq sarapshylar jyl ótken saıyn áýe joldary arqyly ótetin júk tasymaly, ıaǵnı «air cargo»-nyń úlesi arta túsedi degen boljam jasaýda. 2040 jylǵa qaraı áýe júkteriniń 20 paıyzy «Azııa — Eýropa» baǵytyna tıesili bolmaq. Elimiz temirjoldy, avtokólik jolyn jáne áýe tasymalyn qamtıtyn mýltımodaldi logıstıka júıesin qalyptastyrýy kerek, — dedi Memleket basshysy.
Qasym-Jomart Toqaev elimizdiń geografııalyq artyqshylyqtaryn tıimdi paıdalaný qajet ekenin aıtty.
— Elimiz Eýropa men Azııa arasyndaǵy negizgi áýe joldarynyń túıisken tusynda ornalasqan. Biz osy ereksheligimizdi barynsha tıimdi ári utymdy paıdalanýymyz kerek. Ortalyq Azııa jáne Ońtústik Kavkaz aımaǵynda tranzıttik júk tasymalyna baılanysty báseke kúsheıip barady. Sondaı-aq kólik-logıstıka salasyna ınvestıtsııa tartýǵa qatysty talas qyza tústi. Biz de batyl ári tıimdi sheshimder qabyldaýymyz kerek. Áıtpese qolda turǵan múmkindik pen artyqshylyqtan aıyrylyp qalýymyz múmkin, — dedi Prezıdent.
Keńeste Kólik mınıstri Nurlan Saýranbaev, Astana qalasynyń ákimi Jeńis Qasymbek, «Almaty halyqaralyq áýejaıy» aktsıonerlik qoǵamynyń prezıdenti Kose Goker baıandama jasady.
Sonymen qatar talqylaýǵa Premer-mınıstrdiń birinshi orynbasary Roman Sklıar, Energetıka mınıstri Erlan Aqkenjenov, Almaty qalasynyń ákimi Darhan Satybaldy, Básekelestikti qorǵaý jáne damytý agenttiginiń tóraǵasy Marat Omarov, «Samuryq-Qazyna» aktsıonerlik qoǵamynyń basqarma tóraǵasy Nurlan Jaqypov qatysty.
Budan buryn Qasym-Jomart Toqaev Palestına Memleketiniń Joǵary sýdıasy, Prezıdenttiń din isteri jónindegi keńesshisi Mahmud ál-Habbashty qabyldaǵanyn jazǵanbyz. Memleket basshysy Qazaqstannyń Palestına memlekettiligin qoldaý ustanymyn rastady.