Memleket basshysy óndiris salasyndaǵy kemshilikterdi atady

ASTANA. KAZINFORM — Memleket bolashaqta elimizdiń ekonomıkalyq órkendeýine negiz bolatyn aýqymdy ári ınnovatsııalyq jobalardy birinshi kezekte qoldaýy qajet. Bul týraly Úkimettiń keńeıtilgen otyrysynda Prezıdent Qasym-Jomart Toqaev aıtty.

«Elimizdegi óndiristiń damýyna tyń serpin berý qajet. Barshaǵa túsinikti jáne tıimdi ındýstrııa saıasatyn júrgizý úshin byltyr jeke mınıstrlik quryldy. Sodan beri biraz ýaqyt ótti, endi jumystyń nátıjesin kórsetý kerek. Mınıstrlik salanyń damý baǵdaryn anyqtap, ınvestorlarǵa jol kórsetýi kerek. Ozyq tehnologııany qoldanatyn jańa óndirister ashý qajet. Alaıda, naqty sharalar men ádis-tásilder daıyn emes», - dedi Qasym-Jomart Toqaev.

Prezıdenttiń aıtýynsha, óndiristiń damýyna serpin beretin jobalardyń tizimi bar, degenmen, bul jumys ta tolyq aıaqtalmaǵan.

«Bul óndirister ekonomıka qurylymyn ózgertýge, elimizdiń myqty ónerkásiptik negizin qalaýǵa jáne tehnologııalyq ósimdi qamtamasyz etýge tıis. Ázirge munyń eshqaısysy iske asqan joq. Kóptegen jobany qarjylandyrý kózderi aıqyndalǵan joq. Memleket bolashaqta elimizdiń ekonomıkalyq órkendeýine negiz bolatyn aýqymdy ári ınnovatsııalyq jobalardy birinshi kezekte qoldaýy qajet. Osy tusta, jumys istep turǵan óndiristerdi jańǵyrtýmen qatar, elimiz úshin múlde jańa óndiris oryndaryn ashýǵa basa mán berý kerek», - dedi Memleket basshysy.

Aıta keteıik, Úkimet úıinde qaıta jasaqtalǵan Úkimettiń keńeıtilgen otyrysy ótip jatyr.