Memleket basshysy Ómirzaq Ozǵanbaevty qabyldady
ASTANA. KAZINFORM – Prezıdent respýblıkalyq «Ardagerler uıymy» qoǵamdyq birlestigi Ortalyq keńesi tóraǵasynyń orynbasary Ómirzaq Ozǵanbaevty qabyldady. Bul týraly Aqordanyń baspasóz qyzmeti habarlady.
Kezdesý barysynda elimizdiń damýyna jáne óskeleń urpaq tárbıesine qatysty máseleler talqylandy.
Memleket basshysy aǵa býyndy Atyraýda ótken Ulttyq quryltaıda, Qazaqstan halqy Assambleıasynyń HHHІІІ sessııasynda aıtylǵan mindetterdi júzege asyrýǵa, atap aıtqanda jastardy nashaqorlyq, lýdomanııa sekildi áleýmettik keselderden saqtandyrý, otbasy ınstıtýtyn dáripteý isine belsendi atsalysýǵa shaqyrdy.
Ómirzaq Ozǵanbaev Prezıdentke aýyldyq jerlerdi damytýǵa qatysty pikirin aıtty. Sondaı-aq «Ardagerler uıymynyń» bastamasy boıynsha atqarylyp jatqan jumystar men aldaǵy jospary jóninde baıandady.
