Memleket basshysy Oman Sultany Haısam ben Tarıq Ál Saıdpen telefon arqyly sóılesti
ASTANA. KAZINFORM – Prezıdent Qasym-Jomart Toqaev Oman Sultany Sultan Haısam ben Tarıq Ál Saıdpen áńgimelesý barysynda Taıaý Shyǵystaǵy ahýaldy talqylap, osynaý qıyn sátte baýyrlas Oman halqyna tilektes ekenin jetkizdi. Bul týraly Aqordanyń baspasóz qyzmeti habarlady.
Prezıdent Iranǵa qarsy soǵysqa qatyspaǵan Shyǵanaqtaǵy elderdiń azamattyq nysandaryna áýeden shabýyldaýǵa baılanysty alańdaýshylyq tanytty.
Qasym-Jomart Toqaev Qazaqstannyń jaǵdaıdy ýshyqtyrmaı, taraptardy dıalog pen dıplomatııa arqyly qaqtyǵysty sheshý joldaryn izdeýge shaqyratynyn atap ótti.
Bul rette Prezıdent aımaqtaǵy bitimgerlik áreketterge belsene atsalysatyn el retinde Omannyń halyqaralyq abyroı-bedeli joǵary ekenine nazar aýdardy.
Memleket basshysy elimizdiń azamattaryn qaqtyǵys aımaǵynan Oman arqyly evakýatsııalaý máselesine tikeleı aralasqany úshin Sultan Haısam ben Tarıq Ál Saıdqa rızashylyǵyn bildirdi.
Óz kezeginde Haısam ben Tarıq Ál Saıd Qasym-Jomart Toqaevtyń shynaıy qoldaýyna alǵys aıtyp, qasıetti Ramazan aıynda Qazaqstan halqyna baq-bereke tiledi.
Qasym-Jomart Toqaev Oman Sultanyn jyl sońyna deıin Qazaqstanǵa memlekettik saparmen kelýge shaqyratynyn taǵy da rastady. Bul sapar eki el arasyndaǵy dástúrli dostyq qatynastardy jańa deńgeıge kóterý turǵysynan aıryqsha mańyzǵa ıe bolmaq.
Sultan Haısam ben Tarıq Ál Saıd álemdik qoǵamdastyqta bedeli zor memlekettiń basshysy shaqyrýyn yqylaspen qabyl alatynyn málimdedi.
Buǵan deıin Memleket basshysynyń Bolgarııa prezıdentine quttyqtaý jedelhatyn joldaǵanyn habarlǵan edik.