Memleket basshysy Oljas Súleımenovti mereıtoıymen quttyqtady

Darhan Satybaldy Qazaqstannyń halyq jazýshysynyń shańyraǵyna baryp, el Prezıdenti Qasym-Jomart Toqaevtyń quttyqtaý hatyn oqyp berdi.

— Siz Qazaqstanda ǵana emes, halyqaralyq deńgeıde de kórnekti aqyn, tereń oıly qalamger ári bedeldi qoǵam qaıratkeri retinde syı-qurmetke ıe boldyńyz. Sizdiń gýmanıstik ıdeıalaryńyz ulttyq mádenıet pen qoǵamdyq-saıası oıdyń asyl murasyna aınalyp, álemge keńinen tanyldy. Biregeı shyǵarmashylyǵyńyz arqyly qazaq halqynyń tarıhı sanasynyń jańǵyrýyna ólsheýsiz úles qostyńyz, — delingen Memleket basshysynyń quttyqtaýynda.

Almaty ákimi Oljas Súleımenovke ádebıetti, qoǵamdyq oı men ıadrolyq qarýǵa qarsy qozǵalysty damytýǵa qosqan ólsheýsiz úlesi úshin alǵys bildirdi. Ol qalamgerdiń bastamasymen qurylǵan «Nevada-Semeı» qozǵalysy ıadrolyq synaqtarǵa qarsy kúrestiń sımvolyna aınalyp, Semeı ıadrolyq polıgonynyń jabylýyna mańyzdy ról atqarǵanyn jetkizdi.

Oljas Súleımenovtiń esimi táýelsiz Qazaqstan tarıhyna altyn árippen jazylǵan. XX–XXI ǵasyrlardaǵy kórnekti aqyn, zańǵar jazýshy óziniń ádebı murasymen ǵana emes, belsendi qoǵamdyq-saıası qyzmetimen de álemge keń tanyldy. Onyń shyǵarmalary kóptegen tilge aýdarylyp, kóp taralymmen jaryq kórip, oqyrman qaýymnyń zor suranysyna ıe bolyp keledi.

Aıta ketelik búgin aqyn, jazýshy, ádebıettanýshy, kórnekti túrkitanýshy ári dıplomat Oljas Súleımenov 90 jasqa toldy.