Memleket basshysy NVIDIA jáne Firebird AI kompanııalarynyń ókilderin qabyldady
ASTANA. KAZINFORM — Prezıdent Qasym-Jomart Toqaev NVIDIA kompanııasynyń jahandyq jasandy ıntellekt ınfraqurylymyn damytý jónindegi vıtse-prezıdenti Nıkolo Martın Kaprezben, sondaı-aq Firebird AI kompanııasynyń negizin qalaýshylar Razmıg Berg Ovakımıanmen jáne Aleksandr Esaıanmen kezdesti.
Aqordanyń baspasóz qyzmetiniń habarlaýynsha, áńgimelesý barysynda JI-ınfraqurylymyn jobalaý, salý jáne paıdalaný baǵytyndaǵy seriktestik perspektıvasy talqylandy.
Memleket basshysy Qazaqstan aldaǵy úsh jylda tolyq tsıfrlyq elge aınalýdy kózdep otyrǵanyn jetkizdi.
Prezıdenttiń aıtýynsha, NVIDIA tehnologııasy negizinde sýperkompıýter klasterlerin iske qosý atalǵan maqsatqa jetý jáne eldiń tehnologııalyq derbestigin nyǵaıtý isindegi mańyzdy qadam boldy.
Qasym-Jomart Toqaev Ekibastuz qalasynda Derekterdi óńdeý ortalyǵy alqabyn qurý boıynsha strategııalyq joba qolǵa alynǵanyna toqtaldy. Onda esepteý ınfraqurylymyn damytqysy keletin ınvestorlarǵa qoljetimdi elektr energııasy, telekommýnıkatsııa jelisi jáne salyq jeńildikteri qarastyrylady.
NVIDIA jáne Firebird AI ókilderi Armenııada osyǵan uqsas jobany júzege asyryp jatqany jaıynda aıtty.
— Kezdesý sońynda Qasym-Jomart Toqaev pen kompanııa ókilderi JI-ekojúıesin damytý baǵytyndaǵy birlesken bastamany iske asyrý múmkindikterin zerdeleýge kelisti, — delingen habarlamada.
Budan buryn Toqaev Belarýs prezıdentin Astanadaǵy Eýrazııalyq ekonomıkalyq forýmǵa shaqyrǵanyn jazǵan edik.
