Memleket basshysy Nıderland Koroldiginiń Premer-mınıstri Mark Rıýttemen kezdesti
ASTANA. KAZINFORM – Áńgimelesý barysynda saıası, ekonomıkalyq jáne mádenı-gýmanıtarlyq salalardaǵy yqpaldastyqty keńeıtý perspektıvalary qarastyryldy.
– Ózińizben 2015 jyly kezdesken edik. Sol júzdesýdi erekshe yqylaspen eske alamyn. Sizdiń ózara tıimdi yntymaqtastyǵymyzdy damytýǵa qosqan úlesińizdi joǵary baǵalaımyz. Siz basqa áriptesterińizge qaraǵanda Premer-mınıstr laýazymyn uzaq ýaqyt atqaryp kelesiz jáne halyqaralyq deńgeıdegi tájirıbeńiz orasan zor. Sondaı-aq ekijaqty yntymaqtastyqtyń qarqyndy damyp kele jatqanyn atap ótkim keledi. Nıderland – Qazaqstan ekonomıkasynyń eń iri ınvestory. Elimizge quıylǵan tikeleı ınvestıtsııa 120 mıllıard dollardan asty. Elderimiz birlesken aýqymdy jobalardy júzege asyryp jatyr, – dedi Memleket basshysy.
Qasym-Jomart Toqaev Nıderland Premer-mınıstriniń elimizge sapary Astana men Amsterdam arasyndaǵy saýda-ekonomıkalyq qarym-qatynasty damytýǵa tyń serpin beretinin atap ótti.
Mark Rıýtte ekijaqty seriktestik deńgeıin joǵary baǵalady.
Sondaı-aq ol Qazaqstan men Nıderlandtyń yqpaldastyǵyn odan ári jandandyrý qajet ekenin aıtty.
– Men Astanada alǵash ret 2010 jyly boldym. Bul meniń jańa Premer-mınıstr retinde Eýropa Odaǵynan tysqary jerge jasaǵan alǵashqy saparym edi. Sodan keıin 2015 jyly saparmen keldim. Sol kezde júrgizgen kelissózderimiz áli esimde. Ekijaqty baılanystarymyzdyń qarqyndy damyp kele jatqany meni árqashan tańǵaldyrady. Qazaqstannyń óńirlik jáne halyqaralyq kún tártibindegi teńgerimdi ustanymyna aıryqsha qurmetpen qaraımyn. Sonymen qatar elińizdi jańa deńgeıge kóterý úshin atqaryp jatqan isińizdi joǵary baǵalaımyn. Biz aýyl sharýashylyǵy, jasyl energetıka jáne sý resýrstaryn basqarý salalaryndaǵy ıdeıalar men ázirlemelerimizdi bólisýge daıynbyz, – dedi Nıderland Úkimetiniń basshysy.
Kelissóz barysynda saýda-ekonomıkalyq, energetıkalyq jáne ınvestıtsııalyq yntymaqtastyqty, sondaı-aq kólik, ınnovatsııa, atom energetıkasy, aýyl sharýashylyǵy, densaýlyq saqtaý, klımat, sý resýrstaryn basqarý salalaryndaǵy baılanystardy nyǵaıtý joldary egjeı-tegjeıli talqylandy.
Taraptar halyqaralyq jáne óńirlik kún tártibindegi ózekti máseleler jóninde pikir almasty. Sonymen qatar Eýropa Odaǵymen yqpaldastyq aıasyndaǵy dıalogty jalǵastyrý mańyzdy ekenine nazar aýdaryldy.
