Memleket basshysy Negizgi zańnyń 40-qa jýyq baby ózgeretinin habarlady

ASTANA. KAZINFORM — Memleket basshysy Qasym-Jomart Toqaev Negizgi zańnyń 40-qa jýyq baby ózgeretinin habarlady.

«Memleket basshysy retinde men úshin Parlament – elimizdegi saıası júıeniń negizgi tiregi. Sondyqtan aldymen Konstıtýtsııaǵa birqatar ózgeris engizý qajet bolady. 

Negizgi zańnyń 40-qa jýyq baby ózgeredi. Sodan soń kem degende 10 konstıtýtsııalyq zańǵa jáne 50-den astam kodeks pen zańǵa túzetý engizý kerek bolady. Muny jańa Konstıtýtsııa qabyldaýmen teń keletin is deýge bolady. 

Árıne, bul jumystyń bárin taban astynda, bir sátte júzege asyrý múmkin emes. Tyńǵylyqty daıyndyq kerek. 

Sondyqtan aldaǵy reformanyń keıbir kontseptýaldy tustaryna qatysty oı-pikirimdi bildirgim keledi», - dedi Prezıdent.

Qasym-Jomart Toqaev Parlamenttik reforma kezeń-kezeńimen iske asyrylyp kele jatqan aýqymdy saıası jańǵyrýdyń qısynyna saı keletinin de atap ótti.

«Birinshiden, biz barlyq reformany tek evolıýtsııalyq jolmen júrgizemiz. ıAǵnı azamattardyń suranysy, tól ereksheligimiz ben elimizdiń túpki múddesi eskeriledi.

Parlamenttik reforma kezeń-kezeńimen iske asyrylyp kele jatqan aýqymdy saıası jańǵyrýdyń qısynyna saı keledi.

Esterińizde bolsa, saıası reformalardyń tórt paketi aıasynda parlamenttik oppozıtsııa týraly norma bekitilgen edi. Onda ókilderi az partııaǵa Májilistiń turaqty komıtetteriniń birinde tóraǵalyq laýazym atqarý jáne parlamenttik tyńdaý ótkizý týraly bastama kóterý quqyǵyna kepildik berildi.

Budan bólek, partııalar Parlamentke ótýi úshin saılaýdyń tómengi shegi azaıtyldy. Sodan soń 2022 jyly júrgizilgen konstıtýtsııalyq reformanyń arqasynda biz Májilistiń quziretin eleýli túrde keńeıttik. Naqty aıtqanda, búginde Májilis zań qabyldaıdy, al Senat maquldaıdy.

Bul alǵashqy qadamdar edi. Endi sońǵy jyldary qoǵamdaǵy saıası mádenıettiń edáýir óskenin eskere otyryp, biz birte-birte jáne baıypty jolmen bir palataly Parlamentke ótýdi bastaımyz», - dedi Memleket basshysy.

Aıta keteıik, Prezıdent bir palataly Parlamentke kóshý halyqaralyq úrdiske tolyq saı keletinin málimdedi.