Almatylyq oqýshylar Memleket basshysyna ózderi jasaǵan «Robo kıiz úıdi» kórsetti
ALMATY. KAZINFORM — Prezıdent Qasym-Jomart Toqaev Almatydaǵy «Abaı» alańynda ótip jatqan halyqaralyq Nauryz Fest festıvaline bardy.
Bul shyǵarmashylyq shara Naýryz meıramyn toılaıtyn elderdiń — Qazaqstan, Qyrǵyzstan, Ózbekstan, Ázerbaıjan, Tájikstan, Túrkııa, Mońǵolııa jáne Bashqurtstannyń mádenıeti men dástúrin bir shańyraq astyna biriktirdi.
Sheteldik qonaqtar ózderiniń dekoratıvti-qoldanbaly óner týyndylaryn, dástúrleri men ádet-ǵuryptaryn tanystyryp, halyq ánderin shyrqady.
Alańda sharaǵa qatysýshy elderdiń shatyr-sheberhanalary, ulttyq taǵam pavılondary, kıiz úıler tigilgen qazaq etnoaýyly, ınteraktıvti alańqaılar, balalar shyǵarmashylyǵy jáne robotty tehnıka aımaǵy, ınstallıatsııalar, shaǵyn sáýlet nysandary men kompozıtsııalar ornatylǵan.
Festıval baǵdarlamasy aıasynda mýzykalyq ujymdar sherýi, teatrlandyrylǵan qoıylymdar, otandyq jáne sheteldik qolónershiler jármeńkesi jáne «Qamshy» atty kórme uıymdastyryldy.
Memleket basshysyna oqýshylardyń robotty tehnıka salasyndaǵy ozyq ázirlemelerin kórsetetin ınnovatsııalyq alań — «Robo-kıiz úı» tanystyryldy.
Bul jumysty Almaty qalasyndaǵy fızıka-matematıka baǵytyndaǵy Nazarbaev zııatkerlik mektebiniń oqýshylary, Global Challenge 2023 chempıonatynyń absolıýtti jeńimpazdary Dámeli Shaımerdenova, Imanáli Kóksal, Sergeı Gaponov, Nursultan Januzaqov, Nurıslam Turǵynbaı ázirlegen.
