Memleket basshysy Masdar jáne ADNOC kompanııalarynyń dırektoryn qabyldady
ASTANA. KAZINFORM – Memleket basshysy Masdar kompanııasynyń bas atqarýshy dırektory Muhammed Ál-Ramahı men ADNOC kompanııasynyń qaıta óńdeý jáne ótkizý jónindegi bas atqarýshy dırektory Halıd Salmındi qabyldady. Bul týraly Aqordanyń baspasóz qyzmeti habarlady.
Qasym-Jomart Toqaev Abý Dabıge jumys sapary aıasynda Masdar kompanııasynyń bas atqarýshy dırektory Muhammed Ál-Ramahımen kezdesý ótkizdi.
Memleket basshysy Qazaqstan men Masdar kompanııasy arasyndaǵy seriktestik jańa ári sapaly deńgeıge kóterilgenin atap ótti. Prezıdent kompanııa ókilderimen birge Jambyl oblysynda qýaty 1 GVt bolatyn jel elektr stantsııasynyń qurylysyn júzege asyrýǵa qatysty kelisimderge qol jetkizilgenin aıtty. Atalǵan iri jobaǵa 1,4 mıllıard dollar ınvestıtsııa salynady. Óz kezeginde Muhammed Ál-Ramahı kompanııanyń qurylys jumystary boıynsha josparymen bólisti. Sondaı-aq joba aıasynda jel týrbınalarynyń óndirisine jergilikti ónimderdi qoldanýǵa qyzyǵýshylyq tanytyp otyrǵanyn jetkizdi. Qasym-Jomart Toqaev pen Muhammed Ál-Ramahı Masdar kompanııasynyń Qazaqstandaǵy qyzmet aıasyn keńeıte otyryp, jańartylatyn energetıka jáne tsıfrlandyrý salalaryndaǵy mańyzdy jobalardy iske asyrý jóninde pikir almasty.
Sonymen qatar kezdesýge Abu Dhabi National Oil Company (ADNOC) qaıta óńdeý jáne ótkizý jónindegi bas atqarýshy dırektory Halıd Salmın qatysty.
Prezıdent elimizdiń ADNOC kompanııasymen seriktestikti odan ári damytýǵa basa mán beretinin atap ótti.
Halıd Salmın eki eldiń ulttyq munaı-gaz kompanııalary arasyndaǵy ózara yqpaldastyqtyń perspektıvalaryna toqtaldy.
Kezdesýde munaı-gazben qatar geologııalyq barlaý isindegi birlesken ınvestıtsııalyq jobalardy júzege asyrý máseleleri talqylanyp, tsıfrlandyrý jáne jasandy ıntellekt salalaryndaǵy yntymaqtastyqqa erekshe nazar aýdaryldy.
Aıta keteıik, Prezıdent Qasym-Jomart Toqaev Birikken Arab Ámirlikterine jumys sapary aıasynda «Abý Dabıdiń ornyqty damý aptalyǵy» sammıtine qatysty.