Memleket basshysy Mońǵolııanyń Uly Memlekettik Hýralynyń Tóraǵasymen kezdesti
ASTANA. KAZINFORM — Qasym-Jomart Toqaev mártebeli meımanǵa iltıpat tanytyp, onyń elimizge Parlament Tóraǵasy retindegi alǵashqy sapary ekijaqty baılanysty nyǵaıtýǵa tyń serpin beretinin atap ótti. Bul týraly Aqordanyń baspasóz qyzmeti habarlady.
Prezıdent byltyr qazan aıyndaǵy Mońǵolııaǵa jasaǵan saparynyń nátıjesinde Úkimet pen túrli mekemeler arasyndaǵy qarym-qatynas kúsheıe túskenin aıtty. Sondaı-aq jaqynda Qytaıda ótken ShYU sammıti aıasynda Mońǵolııa Prezıdenti Ýhnaagıın Hýrelsýhpen az-kem áńgimeleskenin jetkizdi.
– Mońǵolııa – Azııadaǵy senimdi ári mańyzdy seriktesimiz. Eki el arasyndaǵy berik dostyq pen strategııalyq áriptestiktiń tamyry tereńde jatyr. Sebebi bizdiń salt-dástúrimiz ben mádenıetimiz uqsas. Tarıhymyz da ortaq. Sondyqtan yntymaqtastyqty barynsha nyǵaıta túsý úshin birlese jumys isteýge daıynbyz, - dedi Qasym-Jomart Toqaev.
Memleket basshysynyń aıtýynsha, san qyrly qarym-qatynasty damytý isinde Parlament dıplomatııasy mańyzdy ról atqarady. Bul rette Qazaqstan dostas Mońǵolııa elimen strategııalyq seriktestikti jan-jaqty nyǵaıtýǵa múddeli.
Dashzegvıın Amarbaıasgalan Qasym-Jomart Toqaevqa qonaqjaılyq kórsetkeni úshin alǵys aıtty.
– Bul saparym eki el arasyndaǵy qarym-qatynas tarıhynyń jańa paraǵyn ashatynyna senemin. Búgingi kezdesý kóshpeli órkenıet tarıhy, ádet-ǵurpy tyǵyz baılanysqan halyqtarymyz arasyndaǵy dostyq pen baýyrlastyqty odan ári nyǵaıtyp, elderimizdiń yntymaqtastyǵyn keńeıte túsedi dep oılaımyn. Qazaqstanmen dostyq yqpaldastyqty nyǵaıtý óte mańyzdy. Sońǵy jyldary eki el arasyndaǵy joǵary deńgeıdegi saparlar, kelissózder jıileı túskenine qýanyshtymyn, - dedi Mońǵolııa Uly Memlekettik Hýralynyń Tóraǵasy.
Kezdesýde parlamentaralyq dıplomatııa, saýda-ekonomıkalyq, óńiraralyq, mádenı-gýmanıtarlyq yntymaqtastyq máseleleri talqylandy.