Memleket basshysy Mysyr Parlamenti Senatynyń tóraǵasyn qabyldady
ASTANA. KAZINFORM - Memleket basshysy Mysyr Arab Respýblıkasy Parlamenti Senatynyń Tóraǵasy Ábdelýahab Ábdelrazeqti qabyldady, dep habarlaıdy Aqordanyń baspasóz qyzmeti.
Prezıdent Qasym-Jomart Toqaev Mysyr Parlamenti Senatynyń spıkerine iltıpat bildire otyryp, onyń Qazaqstanǵa jasaǵan sapary ekijaqty parlamentaralyq baılanysty nyǵaıtýǵa tyń serpin beretinine senim bildirdi.
– Biz arab memleketteri arasynan, eń aldymen, Mysyrmen dıplomatııalyq qatynas ornattyq. Búginde Mysyr – Qazaqstannyń ıslam jáne arab álemindegi basty seriktesteriniń biri. Syndarly saıası dıalog jolǵa qoıyldy. Kóptegen ekijaqty shart pen kelisim jasaldy. Osy qarqyndy báseńdetpeı, yntymaqtastyqty nyǵaıta túsý úshin birlesip jumys isteýge daıynbyz. Saýda-ekonomıkalyq baılanystar ekijaqty qarym-qatynastarymyzdyń basty negizi bolýǵa tıis. Buǵan qos memlekettiń áleýeti tolyq jetedi, – dedi Prezıdent.
Ábdelýahab Ábdelrazeq Mysyr Prezıdenti Ábdel Fattah As-Sısıdiń izgi tilegi men sálemin jetkizdi.
– Biz eki el arasyndaǵy qarym-qatynasty, sonyń ishinde parlamentaralyq baılanystardy odan ári nyǵaıtýǵa múddelimiz. Bul alǵa qoıǵan maqsattarymyzdy tıimdi júzege asyrý úshin jasalǵan durys qadam dep esepteımin. Mysyrlyqtardyń Qazaqstanǵa degen qurmeti men yqylasy erekshe. Eki eldi biriktiretin ortaq dúnıeler kóp. Jýyq arada qos tarapqa da tıimdi sharalar qabyldanatynyna senimdimin, – dedi Mysyr Senatynyń spıkeri.
Áńgimelesý barysynda eki el arasyndaǵy parlamenttik dıplomatııany damytý, saýda-ekonomıkalyq jáne mádenı-gýmanıtarlyq salalardaǵy yntymaqtastyqty nyǵaıtý máseleleri talqylandy
Memleket basshysy Mysyr kompanııalaryn kólik-tranzıt, týrızm, tsıfrlandyrý salalarynda birlesken ınvestıtsııalyq jobalardy júzege asyrý múmkindikterin qarastyrýǵa shaqyrdy.
Sondaı-aq Sultan Beıbarys meshitin kúrdeli jóndeýden ótkizip, tarıhı tulǵanyń esimin el jadynda jańǵyrtýǵa zor úles qosqany úshin Mysyr úkimetine rızashylyǵyn bildirdi.
Kezdesýde eki eldiń halyqaralyq uıymdar aıasyndaǵy qarym-qatynasy men jahandyq kún tártibindegi ózekti máseleler qarastyryldy.
Oraıly sátti paıdalana otyryp, Memleket basshysy Qasym-Jomart Toqaev Mysyr Prezıdenti Ábdel Fattah As-Sısıge jyly lebizi men sálemin joldady.
